鄭秀文：
我想同爹哋講：你嘅快樂就係我嘅快樂，爸爸，我愛你！你係我嘅寶貝，自從你甩咗一隻牙，好鬼cute呀！爸爸，我理解你身體上嘅不適有時令你幾辛苦，但你嘅樂觀同堅忍我會永遠記住，作為你嘅女，係我嘅幸福同驕傲，多謝你用一生嘅愛去建立呢個家。
李克勤：
今年我第一年做人爸爸過父親節，但囝囝仲細，佢快高長大就係送畀我最好嘅禮物。我哋成家人一星期最少見一、兩次，平日見到啱嘅嘢都會買，所以我阿爸已經好多禮物。𠵱家希望我個仔快啲大，三歲左右可以同爹哋、媽咪、阿爺一齊打高爾夫。
古天樂：
父親節我要開工拍戲，多數同唔到阿爸食飯，但會同佢補祝。其實阿爸最想我哋有多啲時間陪佢。我完成手頭上嘅戲之後，會陪父母去歐洲旅行，希望去到一個月，當係送畀阿爸嘅父親節禮物。
楊千嬅：
希望爸爸身體健康，多謝佢一直以嚟對我工作上嘅支持，我會送旅遊機票畀爹哋媽咪，希望佢哋玩得開心。旅行地點未定，任由爸爸揀，要環遊世界亦冇問題。
何超儀：
我父親何鴻燊先生，應該係全球華人中收到最多禮物同最快樂嘅父親。咁多年嚟我唔會買好貴嘅禮物畀佢，佢咁有錢，所以我會揀一啲特別嘅禮物。今年我已經order自己間餐廳嘅甜品師傅，炮製一個好味嘅cake送畀爹哋。
任賢齊：
我父親節要開工拍電影，冇時間慶祝，況且我嘅小朋友仲好細。自從做咗爹哋後，發覺做爸爸責任好重大，所以開工反而覺得好充實，有工開至可以畀小朋友更好嘅生活。台灣人嘅父親節係8月8號，到時我會盡量飛返台灣同爸爸食飯，多數送現金支票畀佢。
薛凱琪：
上個月嘅母親節同今個父親節，我咁啱都喺台灣宣傳，唔可以同父母慶祝，自己都有啲內疚，返香港後我會同爹哋食飯補祝。我同爹哋一向好close，日日都係父親節，父親節我都會打電話畀佢，同埋我好想同佢講：爹哋，Iloveyou！
胡杏兒：
我啱啱喺湖南趕返嚟，父親節要開工，不過屋企人想等埋我一齊同爸爸慶祝，所以佢哋改食晏，我都趕唔切買禮物，家姐之前生咗個BB，爸爸𠵱家最開心係抱孫，呢份係最好禮物，我諗我如果係我生個孫畀爸爸，佢都會好開心，哈哈！
