陽光燦爛的日子，一副好嘅太陽眼鏡對保護眼睛好緊要，市面上太陽眼鏡款式越出越多，點樣揀太陽眼鏡其實都係一門學問。最近就有視光師朋友推薦一款可根據紫外線強度同溫度自動變色嘅鏡片，最啱我呢種唔鍾意換兩副眼鏡嘅大懶人用。
根據我個視光師朋友介紹，呢款變色鏡片嘅設計無論喺室內或室外，都可以防UV400度，令到鏡片變色嘅主要元素係紫外線加溫度變化，原則上喺雪地因為極強嘅紫外線加非常低溫，可以變到好似傳統「墨鏡」咁深色，相反喺室內，紫外線比較低，溫度又穩定，所以就會變到最淺色，同一般透明近視鏡無異，變色過程會循序漸進，等眼睛慢慢適應。
司機未必啱戴
不過，有一樣嘢要注意，司機未必啱戴呢款眼鏡，因為車嘅擋風玻璃會隔走紫外光，即使仍然有強光經玻璃進入車內，但因為無咗紫外光，鏡片唔識得自己轉色，所以唔可以擋住強光，揸車嘅時候都係要換番副傳統太陽鏡。
變色鏡片可以一年四季保護眼睛免受紫外光損害，減低患上白內障同黃斑點病變嘅風險，照計應該係唔錯嘅產品，所以視光師朋友即刻配番副畀個寶貝仔，點知個小朋友企喺操場集會，俾老師見到副眼鏡變咗茶色，老師打電話畀家長質問點解畀小朋友戴啲古靈精怪嘅眼鏡返學，我朋友要解釋一輪老師先至明白眼鏡嘅用途。
blog主：醫神