好多大公司都規定員工衣着唔可以太隨便，所以年前煲呔帶頭推行夏天輕裝上班，政府部門、公營機構要出新指引，畀職員參考得體穿衣之道。除咗衣服，原來眼鏡款式都有規矩，廸士尼樂園喺最新一期公司刊物《演講聽》內，特別提供一個儀表小貼士畀員工跟從。
呢個指引針對時下流行嘅粗框眼鏡，廸士尼規定員工只可以戴顏色中性同單色鏡框，為免大家唔明白，仲有相片供大家參考。廸士尼冇講如果員工唔跟指引有乜後果，但八方相信打工仔唔會為咗副眼鏡放棄飯碗啩！
講開呢種粗框眼鏡，近年確實搞出唔少風波，有學校甚至改校規，禁止學生戴款式太花巧嘅粗框眼鏡；廸士尼號稱「夢工場」，可惜滿足唔到員工戴款式獨特眼鏡框工作嘅夢想。