歐國盃打到入直路，呢個月都預咗無覺好瞓㗎啦，不如玩盡啲，唔好匿埋屋企，着埋波衫一齊落吧睇波。過癮㗎，你撐C朗，隔籬枱撐瑞士，你買上盤，我買下盤，大家嗌到口水亁，啪多杯掯Cocktail，酒精上腦更加情緒高漲，到時嗌得仲大聲呀。
記者：洪偉順
攝影：王文忠
模特兒：Carol、Shanna、Pinky@StageModels
一足即發$180，擺壇Set陣有台型，杯叠杯戙到超過兩米高，做Base嗰三杯分別用辣根酒、香草酒、威士忌加白薄荷酒溝成。點火變火柱，即刻用飲筒啜，啜完哄個頭埋去索埋酒氣，酒精同時落肚兼上腦，即High。
上樓吧一味夠嘈
無嘢好講，酒吧越大氣氛一定越好，「M&W」起碼質得落200人，你諗吓200人一齊睇波，氣氛有幾Hot？VIP房、無敵大堂加埋露天BBQ場，坐滿人一定勁嘈，到時想聽個電話都難呀。今晚瑞士對葡萄牙，雖然一隊出硬局一隊出硬線，但估計一樣人頭湧湧，都係早啲入場霸定位穩陣。經理BoBo話：「啲客真係睇得好投入，有時仲會玩埋人浪，笑鬼死人。一有波入，啲客係咁嗌，真係嘈到唔講得笑。」除必備投射螢幕外，呢間場仲有迷你唱台，等你可以扮歌星唱大堂K，提供嘅泰式食物亦相當唔錯。
左起瑞典角球$48，成份有橙汁、苦艾酒同Tequila，刺鼻夠掯；綠茵球場$48，用冧酒、白朱古力酒同Tequila溝成，啜一啖透心凉；葡萄牙插花$40，少甜，混椰子酒、橙汁同紅糖水而成，啱女仔飲。
泰式酸辣鳳爪$35，無骨，白雪雪，冰凍完再上碟，配酸辣汁口感爽脆；泰式豬手$48，先燜再燒，一滴肥油都無，咬落淡淡炭燒香味，好嚼頭。
M&W
尖沙嘴寶勒巷3號萬事昌廣場5樓/31150121
地庫面積最大
無吹水，燈光暗暗哋，咁啱又飲到貓貓哋，你分分鐘會喺「鳳凰吧I」迷路，因為呢間場實在太大，梳化卡位、大圓高枱、小偏廳、大吧頭、木方枱再加埋K房，保守估計擺得落300人。老闆叫Billy哥，鍾情歐陸設計，木欄杆、木酒櫃佢最Buy，仲有鋪儲啤酒精品癮，成櫃精品任你睇：「好多客落嚟睇波㗎，貪夠現場感吖嘛。」呢間場嘅泰國菜非常有水準，好多熟客都話好味過唔少正統餐廳，又係要讚。
後起C朗精神，老闆話橙紅色代表C朗入波入到着晒火喎，用伏特加、橙皮酒同蜜桃汁溝成，好辛辣；歐洲狂熱，用白薄荷同綠薄荷溝成，好Fresh；最佳金球，成份有龍舌蘭同檸檬汁，顏色好靚。各$32。
泰式生蝦$63，必試，泰國新鮮原隻生蝦對半切開，乜都唔加，齋點辣汁最原汁原味；泰式辣椒膏炒海螺$43，海螺肉用辣椒膏炒香，肉嫩夠Juicy，好味到停唔到口。
鳳凰吧I
尖沙嘴漆咸道南17-19號帝后廣場地庫全層/23119033
獨立K房玩得私隱
無行勻所有場，但斷估「BingoBar」都係全老尖最多電子鏢靶嘅一間酒吧，專用射鏢區有5部電子鏢靶，一字排開超有氣勢，手痕想掟鏢，排隊啦唔該。仲有樣嘢要讚，呢間場除大堂寬敞外，仲有超過十間K房，最大一間坐得落十個人，K房設備一流，螢光枱配梳化，有兩部電視，一部睇波一部唱K唔使爭，同圍內大班Friend玩天光爽爆，玩都玩得私隱啲啦。
左起希臘神話$48，用七喜、白薄荷同白谷古溝成，面層泡沫係精華所在，甜甜哋擺明For女仔飲；意大利風情$68，細細杯顏色靚爆，用紅糖水、蜜糖酒加Malibu溝成；亨利特飲$48，藍色代表法國，用菠蘿汁、Lime同Gin酒等溝成，掯嘢嚟㗎。
泰式炒魷魚鬚$58，聞到已經流口水，入口辣汁四溢，口感彈牙；芝士腸蜜糖燒雞翼$58，將芝士腸塞入雞翼再搽蜜糖燒，皮脆到卜卜聲，甜得嚟唔漏。
BingoBar
佐敦吳松街182號榮國中心2樓/23661339