上陣不離父子兵，民主黨議員單仲偕同兩位公子噚日一齊踢波，挑戰社區組織協會嘅無家者足球隊。呢場「無家者世界盃2008熱身賽」，由單雞父子兵搭長毛對無家者隊，一開波單雞兩個讀中二同中五嘅乖仔就發動狂攻，做老竇嘅就同長毛守住後場，但結果都係0比0。
據無家者隊領隊吳衛東講，單雞兩個仔都幾好波；長毛mark人都mark得好緊，feel到佢好似平時請願mark啲高官咁，寸步不讓。至於單雞，都相當賣力，不過阿東嘅評語係覺得佢仍須努力，因為上前助攻嘅速度唔夠快。社協會喺9月搞無家者世界盃慈善賽，有興趣嘅可以上呢個網址睇睇： http://www.soco.org.hk/homeless