梁靖琪（Toby）的爸爸梁家樹是無綫製作部總監，在電視台戲劇製作組內手握重權，但下班回到家後，面對太太和兩個女兒，他卻是個不折不扣的住家好父親。Toby自出娘胎以來，便得到父母悉心照顧，無論在外面工作受了幾多寃屈，只要回到家便享盡家庭溫暖，所以家裏永遠是她的避風港。
下廚煮幾味敍天倫
每年一度的父親節，如果不用工作，Toby一定抽時間與父母一起晚飯，她說：「屋企好重視家庭日，每個周日一家人盡量會喺埋一齊，而父親節除咗會送禮物畀爹哋，我仲準備親自下廚，煮番幾味撚手菜慶祝。」
在家中Toby好像永遠長不大，她笑說：「我都出嚟做嘢幾年啦，但我搵到錢畀爹哋買嘢食，佢收咗之後我當然好開心，但第日我先發現，原來佢將我畀佢嘅錢又靜雞雞擺番入我銀包，驚死我唔夠錢使，我希望終有一日，自己可以搵到多啲錢，媽咪同爹哋可以安享晚年，佢哋可以好放心咁使我畀佢哋嘅錢。」
在Toby眼中，父親既傳統又善解人意，而在父親眼中的Toby，則是聰明、勤力和乖巧的好女兒，當女兒決定要加入娛樂圈時，雖然妻子蕭笑鳴（古天樂經理人）十分反對，但梁家樹最後還是同意了。
藝人在娛樂圈起跌無常，所以父親一早給Toby忠告，他說：「要識得接受輸呢個現實，要學習承受壓力。」對此Toby說：「我真係冇諗過喺娛樂圈壓力係咁大嘅，入行初期受咗委屈，唔敢畀父母知，偷偷喺房喊，點知爹哋媽咪耳仔咁靈，佢哋走嚟安慰我，問我係咪做得好唔開心，如果想唔做就唔好做，但我唔係一個咁易認輸嘅人，所以我會更加努力去做好自己嘅工作，希望有一日可以得到大家認同。」
採訪：陳月媚
攝影：陳慧安