近日嗰啲有車階級嘅朋友周不時喺我耳邊唉唉聲，話啲油價日日飆，荷包就日日瘦身。所以今時今日買車，慳油車仔肯定係熱選。於是我搵埋大師兄丹尼斯，借嚟HondaJazz、Mazda2、NissanTiida同埋ToyotaCorolla呢幾部人氣細車做測試，就操控性能、實用性等嚟個大比拼，睇吓邊部係細車王喇！
記者：鄭達基、梁美甜
攝影：伍慶泉、楊錦文
比拼方法
首先睇實用，即使係車仔，載人載貨當然係越多越好。於是我哋搵嚟幾箱食物加雜物，睇吓邊架「胃口」最大！然後由我同丹尼斯進行行車實試，睇睇各車嘅道路表現，再品評埋外觀，選出佢哋喺邊方面可以稱王。
放置物品及size
a.大背包 41×27.5×51cm
b.中式支裝飲品 37.5×26×22cm
c.家庭裝薯片 39.5×24×33.5cm
d.日式支裝奶茶 37.5×26.5×22cm
e.日式零食 39.5×26×27cm
f.透明雨傘 76cm
g.小型鋁梯 17.5×44×60cm
HondaJazzEX1.3
外觀：Jazz小巧的骰外形加上唔錯嘅性能表現已經贏咗唔少分，加上空間闊落又慳油，一直係年輕一輩追捧熱車之一。佢一對又大又圓潤嘅醒目霧燈經常搶晒分，加上有粉紅、鮮紅、鮮藍等鮮艷顏色選擇，絕對係靚仔潮人至愛，靚樣王非佢莫屬。
闊落度：掀背式上落物品好方便，放晒所有指定物品上去都要動吓腦筋，結果勉強成功，若然摺埋後座載物空間大增，但變相載客量大減嘞！
路面表現：1.3公升i-DSI引擎搭配無段變速波箱，加上車身細，遊走市區游刃有餘，切線走位泊車都好靈活，技術普通都舞得掂。馬力唔算大，只有86匹，唔算強但就有力兼慳油。軚感偏軟，基本駕駛舒服而夠用，起步反應算敏捷，避震卻麻麻。
豪華度：細車以實用性同改裝潛能為主，揀得Jazz十居其九同佢內裝無關，車廠亦無特別將心思花喺車廂豪華配備方面，但基本裝置如真皮軚環、立體聲音響系統等都有，舒適係基本要求啦，有埋天窗就真係要加分。
規格
引擎：1,339c.c.直4SOHC
馬力：86ps/5,700rpm
扭力：12.1kgm/2,800rpm
傳動：無段變速自動波
車輛提供：合群汽車（28278622）
Mazda2
外觀：Mazda2外觀近年無疑越來越年輕，人氣亦因而大增。新一代改用富跑車動感嘅線條，流線得嚟又有型，若然你揀嘅係呢款Freeway頂級版的話，仲有埋包圍，睇落年輕好多。但Mazda2色系稍遜對手Jazz，所以講到靚樣，Jazz始終勝一籌！
路面表現：Mazda21.5公升引擎只有103匹馬力，但短小精悍，懸掛設定傾向跑車化，跑彎定過抬油。丹尼斯最Buy佢嘅15吋輪胎，起步加速反應快過嗰啲用16吋輪胎嘅車款，兼且仲可以慳番唔少油。細車始終較大車好泊位同切線，雖然Jazz基本配備同Mazda2都相似，但比較之下，Mazda2整體操控性更強。
闊落度：Mazda2嘅車長同車闊分別只得3,895mm同1,695mm，不過軸距就有成2,490mm，前後兩排都空間充足。奈何始終係細車，想尾箱放晒指定物品就一定要放低後排椅背，而且仲要拎開隔板。可幸佢係揭背車，所以尾箱入口夠大。
豪華度：Mazda2嘅車廂就真係要扣番些少分啦。廠方的確已經好刻意咁幫佢Design一個同RX-8跑車相似嘅車廂，亦加咗唔少金屬裝飾，但總係覺得如果可以喺中控台等地方加多啲金屬飾邊，整體觀感會再Young啲同埋Sporty啲，當然最好就有埋天窗㖭啦！
規格
引擎：1,498c.c.直4DOHC
馬力：103ps/6,000rpm
扭力：14.0kgm/4,000rpm
傳動：4前速自動波，前輪驅動
車輛提供：萬事得汽車（28931112）
NissanTiidaSedan1.5
外觀：Tiida外形相對地偏向保守，一睇就知係房車，線條簡單、色系多數偏深色，而且選擇唔多，就算外觀比一代有大幅度躍進都好，始終感覺較為穩重，距「靚仔」仍有一段距離。
路面表現：Tiida不嬲出名空間大而闊落，莫講話尾箱，單係前後座之間嘅空間都可以坐得落人。尾箱更巴閉，放晒指定物品都大把位剩，打開埋鋁梯放入去都得，誇！實至名歸成為熱拼實用王。
闊落度：Tiida外形一啲都細，1.5公升CVTC引擎配搭電子智能無段變速波箱，輸出109匹馬力及15.1kgm扭力，性能唔錯，加上偏軟嘅懸掛直路掟彎循迹都表現穩定，惟加速略欠反應，整體操控就絕對容易。
豪華度：呢架Tiida頂級版，皮椅、電動連記憶駕駛座、天窗、頂級音響系統、KeylessGo、多個置物箱以及超大車廂空間，都夠晒豪，乘坐非常舒服，同Corolla嘅內裝豪華感相若。咁都要輸，咪就係因為冇天窗囉！
規格
引擎：1,498c.c.直4DOHCCVTC
馬力：109ps/6,000rpm
扭力：15.1kgm/4,400rpm
傳動：電子智能無段變速波箱
車輛提供：合誠汽車（28035333）
ToyotaCorolla1.5
外觀：屬第十代嘅新款Corolla，可以話係重走舊路玩斯文，造型變得修長扁平，兼且用埋低斜頭燈，令人望落去有啲似同廠嘅Camry。丹尼斯更強烈覺得，如果可以將佢嘅鬼面罩換成跟Camry同款，採用較密嘅欄柵設計，肯定會吸引好多。
路面表現：首先蛇仔式鋪排嘅4前速自動波入波準，而新Corolla嘅1.5公升引擎馬力同扭力輸出增至109匹同14.3kgm，睇落好似好力咗，可惜用16吋輪胎，起跑加速反應都係差些少。傾向舒適嘅偏軟懸掛亦不宜作「過度進取」嘅劈彎動作。
闊落度：廠方表明新嘅Corolla車廂空間比上代大，但感覺好似差唔多（或者丹尼斯又肥咗啦），頭部空間明顯感覺無以前咁鬆動。好在，尾箱空間都算大，指定物品全部「入箱」啱啱好，只係入口不及掀背車大！
豪華度：新Corolla外觀斯文咗但車廂內裝就豪咗。頂級Deluxe版，闊落皮椅散發豪華感，更有天窗設備，而裝飾就由傳統嘅桃木變成金屬。車內更有好多杯座同儲物匣，就連門壁都有。
規格
引擎：1,497c.c.直4DOHC
馬力：109ps/6,000rpm
扭力：14.3kgm/4,200rpm
傳動：4前速自動波，前輪驅動
車輛提供：皇冠汽車（26882778）