港股跌完又跌，完全無起色，一個禮拜4個交易日就唔見咗1809點，同一個月前嘅高位26387比較，跌幅仲驚人，唔見咗3795點，差唔多係一成半。
平時話跌市成交細係好現象，但近排就成交越縮，股市越跌，完全freefall，冇晒承接力，咁搞落去，最後大成交一插嗰吓，相信會非常震撼。咁係咪話港股已經冇希望？又唔可以咁講，個市跌完之後都會升，此乃市場定律，不過，𠵱家未見到有止瀉嘅迹象，就要打醒十二分精神嘞。
𠵱家最佳嘅策略就係揸現金，cash已經唔單止係king，直情就係上帝，有cash遲啲肯定有好多平貨執。短線嘅策略維持細注及速戰速決。
正股短線睇21元
中銀C輪7181：中銀（2388）昨收20.20元，逆市升2.1巴仙，直情係跌市奇葩，短線睇21至22元，可以諗吓隻中銀C輪7181，隻輪昨收19.3仙，槓桿率10.5倍（有效5.7倍），仲有139日期，溢價8.6%，正股升上21同22元，7181應該喺24仙同30仙樓上，即有24至57巴仙升幅，正股如果跌穿19.50元個支持位，就沽咗隻輪止蝕。
俊樺