立法會選舉臨近，有電視台率先搞論壇，噚日請唔同政黨第二梯隊人物試陣，主角係「積極考慮」參選九龍東嘅公民黨余冠威、民主黨胡志偉同民建聯陳曼琪。
八方現場觀察，覺得余冠威表現最有驚喜，據講佢幾重視呢個論壇，近期頻頻操練辯論技巧，更得到喺特首辯論中，寸到煲呔冇聲出嘅「師傅」梁家傑教路，獲師傅越洋電郵傳授「秘笈」，就係一定要操熟有關副局長嘅問題。佢遵從教誨，結果成功喺辯論環節攞到最高分，力壓兩位現任區議員胡志偉同陳曼琪。
寸陳曼琪唔撐黨
余冠威噚日「最應」嘅一擊，要算係當陳曼琪講到副局長問題時，話自己嘅「個人立場」，認為副局長一定要放棄外國籍，余冠威即時質問佢，指民建聯主席譚耀宗同創黨主席「太空成」，都曾公開指副局長持外國籍冇問題，何解陳曼琪「個人立場」同個黨差咁遠？唔通係秉承民建聯成日轉軚嘅傳統？俾人點中死穴，陳曼琪招架無力。
而喺政治常識Q&A環節，余冠威表現不遜於前輩胡志偉，答啱逾半題目，陳曼琪就僅僅答啱一半。好彩民建聯呢位新秀未正式入閘，八方建議佢哋都係集中火力再培訓吓好啲。