四川賑災是非仍沒完沒了，賑災主題曲歌詞被棄用的黃家強，前晚出席苗圃行動活動時，竟直斥藝人到四川災區探訪多餘和博宣傳，家強說：「啲偶像上去慰問係多餘，佢哋上去做乜啫？係咪搬搬抬抬？係咪博宣傳吖？」矛頭似直指早前到四川探訪的劉德華、鄭秀文及容祖兒等人。
黃家強前晚與黃伊汶出席奧海城舉行的「天崩地裂不放棄苗圃行動」籌款活動，有記者問他有否捐錢救助四川災民時，家強說：「我有捐，我哋呢啲只可以做呼籲叫人捐。」
「佢哋上去做乜啫」
之後記者再問他對早前藝人到四川探訪睇法，以及有沒有打算上四川探訪時，家強竟連珠發炮，越講越㷫：「我覺得佢哋（災民）失去家人，講乜都冇用，我知道同好明白失去家人嘅感受，我冇咗阿哥（黃家駒），人哋行埋嚟同我講唔好咁傷心，我係咪就唔傷心？冇可能，唔會囉！啲偶像上去慰問係多餘，佢哋上去做乜啫？係咪搬搬抬抬？唔係吖嘛！佢哋上去做乜啫？宣傳呀？定係講嘢呀？係咪博宣傳吖？嘥氣囉。」
葉世榮昨日在另一場合卻表示目前工作會以賑災為主，他說：「過兩日我會去甘肅、重慶好多地方做賑災，唔止我啲工作亂晒，成間公司都一樣，不過我哋都希望可以出一分力。」
由於早前家駒遺作《海闊天空》用作四川賑災活動主題曲，有傳曾志偉事前沒通知家強借歌，最後又沒採用家強填的歌詞，令他淪為掛名監製，未知是否因此不滿而借意發牢騷。
「唔同方法憶家駒」
日前Beyond三子為紀念家駒逝世15周年搞紀念音樂會，但事後卻被指猶如家強個人騷，對此家強說：「咁我係發起人，其他人係嘉賓，唔可以要求人哋唱咁多歌。」有指音樂會上他與黃貫中（Paul）零交流，家強沒好氣說：「其實我哋心知肚明，有幾好唔需要同人交代，嗰時阿Paul彈結他唱歌，我就只係唱緊歌，佢做緊咁多嘢，唔可以望住我，我同阿Paul感情冇變。」
此外，家駒生前好友梁翹柏日前在網誌上暗指有人藉音樂會作商業活動，前晚梁翹柏解釋說：「我唔係咁嘅意思，我冇話好商業，呢啲係個人形象投資，總之每個人有唔同方法去懷念家駒，我見到報道都嚇咗一跳，我會打電話畀家強講番聲。」
阿Paul昨日到商台接受訪問，他在本月30日會在StarHall舉行Band騷，當日正是黃家駒死忌，阿Paul說：「其實唔係故意，真係咁啱有個期，只可以話係天助我也，當日唔會特登做啲乜嘢，只係可能唱歌嘅時候會同家駒致敬或者會覺得好掛住佢。」
採訪、攝影：楊潔雯
