歐國盃開戰一星期，雙「牙」鋒芒畢露，是好是壞有待時間證明，至少已吸引《拉闊足球場》讀者的支持；大部份人看好西班牙可一改以往逢大賽虎頭蛇尾作風，甚至有人認為雙「牙」南歐決賽之局漸呈。
今集討論重點：
1.你最想邊支強隊小組出局？
2.你最不想邊支強隊小組出局？
3.點睇今屆西班牙前景？
戰鬥員A/藍鑽石
鋒芒太露肯定唔係好事
西班牙喺大賽分組賽強勢，但到淘汰賽「甩轆」屢見不鮮。歷史話畀大家聽，06世界盃分組賽最搶鏡嘅阿根廷、西班牙最後都失利，鋒芒太露肯定唔係好事。
西班牙首仗對俄羅斯攻勢太集中在中路，且後防有漏洞，未必如想像般咁強，暫未見冠軍相。不過，其他強隊實力都好似弱咗，所以西班牙都有力闖4強，但最多亦係4強貨仔。
鐵人：決賽係雙「牙」戰
我最想意大利早啲出局，因為啲波睇到人悶；老實講呢支世界冠軍亦冇殺着，寧願睇同組嘅羅馬尼亞出線，至少多份新鮮感，好睇啲。西班牙以往喺分組賽鋒芒太露，虛火，但今屆第一場畀人感覺唔同，3線實力平均，配搭好好。韋拿連中三元，而我心目中嘅頭號射手費蘭度托利斯都未嚟料，相信餘下賽事會慢慢「撻着」，到時冇邊隊可以擋得住。最重要係今屆冇話邊隊特別標青，既然西班牙、葡萄牙近況畀到人信心，決賽可能係「牙」碰「牙」都唔定。
金水：今屆進攻主導
今屆同上屆唔同，勝負取決於邊隊進攻好，多波入，防守反而係次要，好似希臘嘅打法唔再有着數。我覺得西班牙前景樂觀，穩入4強，兩個前鋒韋拿、費蘭度托利斯都相當厲害，能夠對俄羅斯，而唔係奧地利之流攻入4球，絕對唔簡單。另外，我最唔想意大利分組賽出局，因為有球星同埋個人技術好；最想法國早收工，因為第一場表現名大於實。
Alan：好正！坐亞望冠
D組肯定係西班牙同瑞典爭第1、第2名，邊隊首名都冇所謂，西班牙第一場波對俄羅斯嘅表現，好正！結果大勝4:1，雖然嗰場我貼咗4:0波膽差少少，但總算帶挈我中咗「主勝」而贏錢。呢隊波今屆真係好正，我估佢哋4強會對荷蘭，如果打贏埋，無論最後對另一條線嘅葡萄牙或者德國都有機會，坐亞望冠。
意見統計：西班牙去到邊個階段？
Alan：決賽 Eva：決賽 Ringo：決賽
鐵人：決賽 Koo：4強 金水：4強
Marco：4強 Andy：4強 無難度：小組出局
加料炮製
歐國盃期間，逢周一及周四都可以網上收睇《拉闊足球場》，本節目估波遊戲第2階段於17/06起接受登記。我們將提供$300供讀者從「冠軍」及「神射手」兩項中自由投注（最多兩注），參賽名額有限，先到先得，快啲登記啦！
《拉闊足球場》下次舉行日期：16/06
神秘嘉賓現身！
想參加？即上
http://soccer.atnextcom/jp/soccer
節目重溫：
http://sport.appledaily.com