特區政府多年嚟向煙民好言相勸，希望佢哋為健康着想快快戒煙，民主黨鄭家富認為成效麻麻，就算有咗禁煙條例，煙民數量都好似冇乜減少，阿富雖然唔係煙民，但知道戒煙難，如果冇誘因，煙民真係睬你都儍。
建議自費上戒煙療程
阿富話苦思多時，終於俾佢度到條絕世好橋，就係修訂《2008年定額罰款（吸煙罪行）條例草案》，建議喺法定禁煙區吸煙嘅違例人士，如果被檢控，可以選擇繳交1,500蚊定額罰款，或者自費接受政府開辦嘅戒煙療程。
根據阿富建議，選擇戒煙嘅人士，必須喺三星期之內按輔導人員嘅指示戒煙，否則就要額外繳交1,500蚊罰款，佢話咁做可以令更多人參加戒煙療程，政府又唔使增加開支，兩全其美。八方卻諗唔明，煙民直接交罰款一了百了，如果自費戒煙唔成功，咪仲傷荷包？
阿富關心煙民，亦針對酒徒就《2008道路交通法例（修訂）條例草案》提出修訂，將首次觸犯酒後駕駛罪行嘅停牌期限，由最少三個月改為六個月，希望可以加強阻嚇力。民主黨提出嘅修訂獲通過機會好微，煙民、酒徒唔使太擔心。