四年前在美國節目《一夜成名》（AmericanIdol）中憑騎呢歌藝出位的孔慶翔(WillianHung）日前脹爆回歸，跟得爹哋孔爸爸也千里隨行，前日孔慶翔完成活動後即拖父逛街預祝父親節，齊嘆排毒降火龜苓膏之餘，孔慶翔更買美國惡搞動畫《星球大戰敗家版》DVD笑餐飽，其父則買特價皮帶，各有所獲，但三項消費也同樣由孔爸爸埋單。
孔慶翔04年扭籮載歌載舞大唱《SheBangs》，在美國節目《一夜成名》中出位、笑到評判肚痛的一幕，至今仍令人留下深刻印象。一炮而紅的William四年後回歸，本已肥底的他又發脹，前日他在港出席活動後，即偕父親出巡各自掃貨，順道預祝今日的父親節。
狂為兒子拍照
William當年奇迹走紅，其家人視為光宗耀祖，前日他來港在銅鑼灣一間酒店出席「世界明星慈善麻將大賽2008」記者會，同行的孔爸爸非常緊張，見囝囝接受TVB訪問，馬上舉機拍照留念。至記者會結束，孔氏父子齊上房休息，1小時後轉裝及戴cap帽外遊，各自拎着雨傘往崇光百貨，內進後即取雨傘膠袋，但他們掹來掹去都搞不掂膠笠，搞足幾分鐘才成功套入雨遮，過程相當狼狽。
未被途人認出
本來孔爸爸要到皮具部，但父子去錯玩具部，經店員引路再到特價場揀皮具，孔爸爸自掏腰包買了一條200元有找的減價皮帶後，William便到書局睇漫畫，但無斬獲，於是父子轉往鄰街的海天堂，點了兩碗有排毒降火功效的龜苓膏，由孔父埋單。不過William似未掃貨心不息，又帶父親去VCD舖揀碟，終買下價值139元的美國動畫《星球大戰敗家版》（FamilyGuyBlueHarvest）DVD，同樣由父親畀錢，其後父子折返酒店，但全程未被途人認出。
William形象騎呢眾所皆知，想不到他內外如一，連睇碟都充滿娛樂性。據知《星》片內容都是惡搞一輪，主角取材自星球大戰人物，上演古靈精怪大混戰。
採訪、攝影：娛樂突發組