方中信噚日朝8點幾到達養和醫院，為太太莫可欣辦理出院手續，甫到場嘅方中信行色匆匆步入醫院，仲笑笑口向記者表示稍後再交代太太出院事宜，大概下午12點半方中信手抱愛女，表現得好雀躍咁喺醫院大堂接受傳媒採訪，問到太太點解未有一齊出現時，佢話：「佢冇化妝唔想影相喇！」
為咗迎接太太同B女出院，方中信話已經一切準備好：「一早請咗陪月同買咗好多補品，仲有BB床都準備好，太太生完要補番身體。」問到會唔會為B女擺百日宴或滿月時，佢話：「仲諗緊，都係要睇時間，應該會喺7月。」莫可欣生產完身體良好，但依然有水腫，暫時連婚戒都戴唔到。
「擔挑孭20幾年」
方中信話未為愛女起中文名，但目前已經有兩、三個考慮中，佢話：「中文名仲商量緊，都有問師傅，咁佢話出生時間好好，所以唔使就筆畫，英文名等佢自己改，怕佢大過唔鍾意。」問方中信會唔會再追個仔時，佢話：「冇得追喇仲追！個擔挑今日先孭上身，仲要孭成20幾年。」問到太太目前餵人奶定係奶粉時，佢好尷尬仲沉默幾秒之後話：「BB食人奶。」