呢排熱辣辣，雪櫃塞滿晒汽水同埋啲糭，唔知係咪多得滯，搞到雪櫃呢幾日突然發出好嘈嘅隆隆聲，好似會爆炸咁。嚇得小妹即刻call港九電器工程電業器材職工會技術總監孫名林求救。
孫名林笑笑口話，應該係雪櫃嘅壓縮機有問題，但唔會爆炸嘅。佢叫小妹用手摸吓雪櫃左、右兩邊外殼熱唔熱，「雪櫃製冷嘅原理，係會將雪櫃入邊嘅熱氣帶走，所以正常外殼係熱熱哋，唔熱代表個壓縮機神神哋，帶唔走熱氣。」如果壓縮機壞咗，修理要二、三千蚊，不如買過部新嘅。
佢教路話，今時今日買雪櫃，一定要買有能源標籤嘅，價錢比冇能源標籤嘅只不過貴少少，但可以慳成35%電費，「一般雪櫃每月電費大約200蚊，能源標籤雪櫃可慳70蚊。」佢話，𠵱家巿面有好多雪櫃都有能源標籤，應該揀能源效益最高嘅，「能源效益分五級，一級最慳電；三門嘅雪櫃又比雙門慳電。」同一級別嘅價錢都有好大分別，主要係款式同功能嘅問題，同標籤無關，「好似有急凍功能嘅雪櫃咪貴啲」。
慎防整壞壓縮機
佢話，正確使用雪櫃，壓縮機長命啲，好似擺放雪櫃要留啲空間散熱；關雪櫃門要㩒實唔好漏罅；擺放食物頂多八成滿。仲有一樣嘢好多巿民忽略咗，唔識處理停電會谷壞壓縮機，「停電一、兩個鐘，其間千祈唔好打開雪櫃，等有番電畀壓縮機自行運作。如果停電6、7個鐘要掹咗插蘇，等雪櫃完全融雪先開機；未完全融雪就開機，會整壞壓縮機」。
電郵：mailto:[email protected]
逢周六、周日刊出