【本報訊】油價持續飆升，私家車司機叫苦連天。有30年駕車經驗的汽車工業學會副會長李耀培為求自保，年半前自製一本「慳油秘笈」，再經過10招慳油特訓後，當時每公升汽油大約行走7.4公里，增至現行駛8.4公里，油費也節省了25%，剛好抵銷過去一年油價升幅。 記者：蔡朗清
「油價係咁升，年半前我正式實行慳油大計，但點樣好有系統咁落實慳油特訓，就好靠我呢本記事簿。」正在駕駛平治E-Class的李耀培，從懷中取出一本黑色記事簿予記者觀看，便是他的「慳油秘笈」。
勁踩油後踩brake要戒
原來李耀培每一次入油，均會在秘笈寫上入油量、價錢及行車總里數，「咁樣我就可以計到每公升油可以行幾多，從而修正我嘅駕駛態度，點樣揸車可慳幾多油。」他說，經過3個月慳油特訓，成功拿揑慳油駕駛絕技，由年半前每公升汽油大約行走7.4公里，增至現在可行駛8.4公里；每月油費平均保持去年的4,000多元，變相抵銷25%的油價升幅。
李耀培說，慳油第一招不要胡亂踩油，「我以前揸車，起步嗰陣會大力踩油，喺轉紅燈前會勁踩油希望可以過燈位，但好多時過唔到要踩brake。咁樣係雙重嘥油，一定要戒；再加埋清理晒車尾箱嘅雜物，減輕車身重量，可慳約4%油費。」
「至於空波滑行係可以慳油，但冇咗制動好危險；反而喺平路唔塞車用高波段行駛，既安全又可達到空波滑行省油嘅同樣效果」。
條胎唔夠氣多食油4%
不少司機忽略了輪胎氣壓不足夠，也會增加汽油消耗，「如果條胎唔夠氣，照揸車好食油，講緊可以用多咗3、4%油費。應該每月要check一次胎壓。」他說，汽車保養得好，每行走6,000公里要換風隔、偈油等，可省回達12%油費，「我𠵱家keep住mark簿（秘笈），一旦油用多咗就知部車機件有問題要維修。」
李耀培續稱，選擇慳油配方的汽油可達致慳油目的，「我唔會買一啲爆炸力勁啲嘅貴價油，會試多啲唔同嘅慳油配方嘅油。使用唔同牌子嘅油唔會傷車嘅」。
李耀培每月約三次會從觀塘辦公室駕車到尖沙嘴開會，因尖東經常塞車，來回油費達60元，加上停車場泊4小時120元，開支達180元，「我諗咗個方法，將部車泊係日泊60蚊紅磡火車站平價停車場，避過失車，慳油同停車場費達80蚊。」
慳油10招
1.選購1500cc以下的小型車及選用慳油配方的汽油
2.每次入油記下入油量、價錢及總咪數，以驗證慳油駕駛效果
3.減少不必要用車，行車前先想想最直接暢順路線
4.避免急加速及急減速行車
5.避開車流高峯時段和路段
6.停車熄匙，有必要才開空調
7.平路駕駛可用高波段駕駛
8.避免過高速行車及長時間怠速行車
9.行李箱不要攜帶不必要物品
10.保持輪胎合適的氣壓及定期檢查維修汽車
資料來源：李耀培
特稿：油站推優惠搶客
油價高企，部份油公司推出優惠搶客。埃克森美孚最近推出中銀Esso萬事達卡，在Esso或東方石油油站簽賬入油，根據入油量可享分段式每公升0.7元至1.3元折扣；迎新禮品金卡、普通卡贈300元油券，白金卡贈500元油券。
蜆殼推出ShellCitibank白金Visa卡，也根據入油量可享分段式每公升0.7元至1.3元折扣，迎新禮品500元油券。加德士的大新AutotollVisa卡入油可獲4%起折扣。在中石化油站入油每公升即時折扣0.98元。中石油無論以現金或任何信用卡入油，每公升回贈1.2元，以中銀卡簽賬更享91折，最抵之選。汽車工業學會副會長李耀培提醒車主，「因優惠專登揸較長車程去入油，可能仲嘥油」。
本報記者