相信你曾經諗過呢個問題：「如果識得隱形，最想做啲乜？」唔使心邪邪，事關電影界早就拍過一齣《透明人魔》，男主角學會隱身之後，簡直鹹濕賤格乜都齊！近期，荷李活翻炒類似橋段，《越空行者》換上靚仔凱頓基斯登遜揹重飛，佢雖然唔識隱形，但懂得瞬間轉移，閃一聲，瞬即暢遊埃及、羅馬，甚至銀行夾萬，簡直係每個人嘅夢想！DVD版啱啱推出，Bonus更披露特效製作介紹，想知瞬間轉移可以做啲乜？買番隻DVD睇啦！
記者：陳國輝
故事簡介
讀緊中學嘅男主角，因一次幫女友執番個水晶球，差啲連命仔都冇。不過錯有錯着，喺生死關頭一刻，佢突然間閃一聲去咗另一個地方，從此認識到自己擁有瞬間轉移能力，更開始計劃一連串破壞社會秩序嘅惡行！另一邊廂，數名狩獵者亦不斷窮追猛打追殺佢哋，背後原來隱藏住一個驚天大陰謀。
瞬間轉移做啲乜？
自保：
為咗執番個水晶球，主角差啲跌落冰湖浸死，幸好佢突然間使出瞬間轉移，閃一下就到咗圖書館。
偷錢：
掌握咗點用特異功能之後，佢立即部署洗劫銀行夾萬嘅大計，拎到錢後更唔理老竇，離家出走。
遊埠：
已經成年嘅主角，依然係無所事事，佢拎住筆錢周圍食四圍嘆，更利用瞬間轉移環遊世界。
媾女：
冇見女友幾年，突然間又蒲頭，仲用佢使不完嘅金錢帶埋女友到羅馬豪玩，偷偷潛入鬥獸場參觀。
殺人：
瞬間移動仲可以帶住其他嘢穿越時空，另一名快閃黨員就將架雙層巴士拖入沙漠，企圖撞死狩獵者。
快閃睇寰宇風情
作為觀眾，睇住男主角呢頭閃去埃及，嗰頭又閃去倫敦，好似好輕鬆咁，查實幕後製作不知花咗幾多人力物力同時間！未睇過Bonus都唔知，雖則話電腦CG乜都可以畫出嚟，但據曾經拍攝《史密夫決戰史密妻》嘅導演德格里文話，呢套電影好多都係實景拍攝，例如羅馬鬥獸場呢一幕，就係意大利政府破天荒借出嚟畀片商用；至於其他如埃及獅身人面像、美國大峽谷等，則有一部份係經CG繪製而成，但表面上完全睇唔出！屈指一數電影內所用場景，其實除咗埃及同羅馬之外，還有日本、非洲、倫敦等等，睇完套戲，直頭好似環遊世界咁！
漫畫特效大公開
家陣電腦CG近乎每套電影都應用到，但連StoryBoard都細緻到好似睇漫畫咁，你又見過未？講開DVDBonus，如果只得幕後人員專訪，或者超流製作花絮，咁就真係交行貨！但呢次有少少唔同，Bonus內其中一項係欣賞漫畫化嘅劇本，咪睇小佢只係StoryBoard咁簡單，實情畫面勁Colorful，而且仲有埋動作，十足真人落場Action咁堅！至於真正CG部份亦唔少，最經典一幕當然係巴士穿越時空駛咗去沙漠，總之一句講晒：夠震撼！
參加抽獎送PS3
內附Bonus碟不特止，仲可參加抽獎。凡於8月15日或之前購買香港A區Blu-ray版，並保留包裝上宣傳及收據正本，即可參加網上問答遊戲，以最短時間完成者，就有機會獲得銀版Playstation3主機一部！有1080p高清畫面，又有DTS-HDMasterAudio靚聲，直頭係睇碟最高境界啦！
參加網址： http://www.deltamac.com.hk/minisite/jumper/game.php
PROFILE
片種：動作劇
導演：德格里文
主演：凱頓基斯登遜、戴安蓮、森姆積遜
音效：杜比5.1
