兩岸復談，買寶島概念，唔少得漢登（448）。寶島一直都係漢登核心業務地區，以08年半年度（9月底止）為例，地區佔咗集團營業額40%。呢個收益比重，唔嘢小。要咁睇，寶島最近呢幾年經濟不景氣，各行各業冇乜運行。但隨住兩岸復談協商，對寶島經濟谷底反彈，有好大寄望。大圍好景，漢登一樣會受惠。
漢登近年主力透過南韓市場食糊，08年半年度，集團純利都有15%增長，上到631萬銀美金。相信南韓市場，會繼續支持漢登，去銜接寶島地區嘅爆炸性增長。漢登08年度純利維持半年度15%增幅，上到1600萬銀美金，預期PE都係得5.5倍。
漢登08年度每股派息，係咁意keep住07年度息率7厘，吸引到爆。漢登見有調整，吼實50日線0.66元入貨，就算以8倍PE做目標，亦要見1字頭，現價（0.7元）回報率，講緊42%。
北青中線博升76%
北青傳媒（1000）揸住淨現金12.8億銀人仔，等於每股7蚊港銀，北青現價都係得3.98元，殘得離晒譜。北青呢隻超級現金牛，確實係有畀大股東私有化嘅質地。但反而要咁睇，北青最終對口單位係北京市政府，買北青，係博佢中、長線獲得注資兼畀阿媽湊大。
又08奧運嚟緊頭，北青近水樓台，應該商機處處，亦可炒北青08年度（12月底止）業績復蘇。買北青，擺中線，博上番每股淨現金值，現價要升近76%。