3　Market：<br>swatch三腳雞錶展

3　Market：
swatch三腳雞錶展

一向鍾情膠錶的我，對Swatch可謂又愛又恨，歸咎於多年前被我錯手弄壞的一隻限量版Swatch，後來維修無門，結果落得封塵櫃底。好彩Swatch季季推新款，價錢數百元，令人愛不釋手。今回最新搞作，引入亞洲首架俗稱「三腳雞」流動販賣車，把經典系列膠錶作展覽陳列，還有最新系列及過去舊款系列同時發售，睇怕今次要被Swatch斬得一頸血。

記者：劉明慧
攝影：譚盈傑
Model：Geneieve.Y@HKGenesis

復刻流動販賣車

流動販賣車在外國街頭，多得如香港「7仔」，Swatch今次獨具慧眼引入香港，卻不賣鮮花熱狗，只賣錶。Swatch這架流動販賣車叫Swatcholino，由一架復刻版「三腳雞」改裝而成，夠晒台型。今次利用其舉行「My1stSwatchExhibition@Swatcholino」展出多款Swatch經典手錶，其中更有被炒至高達10萬元的Swatch，一次看盡經典，機會難得。可惜香港法例多多，這架Swatcholino不能周街去，只能停在DelayNoMall商場內，算是點點遺憾吧！

■復刻版「三腳雞」Swatcholino，是亞洲首架流動手錶販賣車。

■車上會不時更換新款系列Swatch。

■過去的舊款式都可以在車裏找到，大部份都已停產兼極限量，睇中就不要手軟。

經典限量逐隻睇

展覽尚有大量經典Swatch展出，目不暇給，先介紹幾款過你睇。

■POPSwatch97年限量版Feathers大玩羽毛，羽毛誇張到連錶面都看不到，看不到錶面的手錶，夠Gimmick啊！

97年限量版Gnomania，全球限量2萬套，以小蘑菇做包裝，連錶帶都有可轉動的小精靈公仔，十分可愛。

■95年聖誕限量版MagicSpell，包裝似足故事書，錶面以立體水球做成蓋，打開即可看到時間。

■這個VictorySet現時炒至近十萬元，當年為亞特蘭大奧運特別版。錶盤設計以金、銀、銅做圖案，全球140套，極罕！

董事長轉到頭暈

Swatcholino長期停泊在DelayNoMall內，車上不時換上新系列錶款，今季最新PuzzleMotion系列，其中一款由董事長Mr.NicolasGeorgeHayek肖像為圖案的珍藏版更成焦點。PuzzleMotion系列特別之處是錶盤能隨着時間而轉動，變化出不同圖案，有如萬花筒般千變萬化﹗

「HAYEKBRANDEDWATCH」珍藏版$600

以被稱為「瑞士手錶界的巨人」的Mr.Hayek縱橫錶界二十年，今回Swatch似向他致敬，將他肖像製成手錶，港澳地區合共發售60隻，極具收藏價值。