04年在《一夜成名》中，以「騎呢」舞步翻唱《SheBangs》而出名的孔慶翔（WilliamHung），雖然他曾經熱爆娛樂圈，可惜後勁欠凌厲，拍罷電影《我亞媽發仔瘟》一片仆直後便銷聲匿迹，誰知昨日他竟現身一個麻雀比賽，活動上除演繹新歌外，脹爆的他更大談近況和感情生活。
昨日在銅鑼灣舉行的「世界麻將錦標賽」記者會上，竟然見到曾經熱爆娛樂圈的騎呢歌手孔慶翔蹤影，身形比以前脹爆了不少的William，在活動上他清唱自己的英文新作《AchyBreakyHeart》，可惜他口齒不清，大家也聽不到歌名，但也有幫手打拍子。
練空手道KeepFit
William的配合度依舊相當高，為滿足在場傳媒要求而大擺不同形態的「甫士」拍照。談到他的近況，William表示：「我𠵱家喺美國出咗第三張album，仲有幾部電影傾緊，但你知荷李活嘅電影有合約所限，所以唔係幾方便講內容，我今次只係留一個禮拜，今日或者聽日就走。」
講到他脹爆的身形，William有點尷尬地說：「係差咗少少呀，不過我有練空手道去keepfit，我都知好難keep番以前個身形。」
擇偶唔係靚就得
後來又問到他目前的感情生活，William說：「𠵱家仲搵緊，唔係我要求高同挑剔呀，我嘅擇偶條件唔單止係靚女就得㗎，仲要同我溝通到，一齊生活開心，我身邊都有好多女性朋友，所以會考慮吓。」
同場還有轉戰內地拍劇的陳松伶，她笑指有感「有麻雀就有朋友」，所以前幾年去學打麻雀，可惜麻雀腳至今仍是以家人為主，談到她的感情，松松說：「我一向都唔係高調嘅人，所以唔想講太多，只係同朋友分享，總之𠵱家好開心同穩定，如果到結婚嗰日，睇吓情況再決定會唔會公開。」
採訪：何慧斯
攝影：陳慧安
