之前提過歐洲人最識從大賽中做生意，今次歐國盃有唔少足協贊助商出錢出力，不論門票、比賽指南或宣傳物品都可以見到各個贊助商個名，畀錢之餘，機構亦真係可以提升吓自己品牌的形象。
每場球賽，贊助商同直播夥伴都獲派特別證件，可以進入場內的UEFACLUB內進餐，商業機構唔少巨頭都先來呢個區食番餐，傾吓公事，而歐洲足協亦響場內擺放咗各支參賽球隊嘅決賽周波衫嚟等人望；到開波後，UEFACLUB就會變得空空如也，因為各路人馬都就坐搵個靚位睇波，完場後，又再熱鬧番。
如果有機會嚟到UEFACLUB，又有機會見到經歐洲足協精挑細選嘅「接待員」(圖)；其實先前喺維也納已經「見識」過做接待的女義工嘅質素，一句講晒質素真係相當唔錯，而喺蘇黎世所見，質素又更進一步，咁自然要影低俾大家品評吓。據聞喺UEFACLUB做接待個個都經過嚴格挑選，要達某一個高度外，仲要有棚靚牙，先至可以用最靚嘅笑容迎接各地VIP。
問班女仔最鍾意邊個球星，票數最高係費蘭度托利斯，C朗都唔夠佢人氣勁，唔通因為C朗緋聞多又傳結婚，所以唔得佢哋歡心?
文：雷民