太儍、太天真嘅阿嬌，因為淫照風波人氣急跌，喺娛樂圈銷聲匿迹，「身價」同舊時不可同日而語，最新價啱啱新鮮出爐，令人幾意外。運輸署噚日舉行自訂車牌拍賣，同阿嬌個名同音嘅「G1L」車牌，僅以11,000蚊成交，反觀阿「SA」車牌，卻賣到高價170,000元，真係同人唔同命。
車牌行執到平貨
「G1L」同「SA」兩個車牌都係由車牌行投得，負責人顏生強調並非TWINS嘅粉絲，出手投牌係因為覺得呢兩個牌同好多公司嘅英文名簡寫相同，估計日後有機會轉手，而兩個英文字母嘅車牌，類似無字頭數目字車牌咁，由於買少見少，所以一向較為值錢，所以捨得出高價競投。
顏生今次可能成功撈底，事關舊年一個阿「G1LL」車牌成交價65,000蚊，今年呢個阿「G1L」價錢卻跌至11,000，足足平咗54,000蚊，阿「G1L」忽然大劈價，抵佢執到平貨。阿「SA」、阿「G1L」身價差咁遠，雙劍合璧又值幾多呢？噚日同場有個「TW1NS」牌拍賣，經多口叫價，最終落喺巴籍買家Jabber手上，以27,000投到呢個牌。佢話根本唔知TWINS係乜鬼組合，投呢個牌係送畀孖生姪仔嘅生日禮物。
得意牌配法拉利
玩開特別車牌嘅人都知，兩個英文字母嘅牌較好價，噚日最高價22萬元成交嘅係「KP」，「KL」同「BY」則各以20萬元賣出；其他較得意嘅牌價錢一般，好似鹹蛋超人一對眼嘅車牌「0V0」，以52,000蚊成交。呢個牌由買家翁先生勾出，佢指「V」字係勝利手勢，兩個「0」就係一對眼，佢會將個牌掛喺法拉利跑車上，架車身價不菲，幾萬蚊買個心水車牌物有所值。
八方卻認為，揸跑車可以考慮買個「2FAST」車牌，呢個牌以50,000蚊成交，價錢唔算tooexpensive。得意車牌有價有市，但唔係個個牌受歡迎，「AFATB0Y」同「FE1CHA1」就冇人要，由運輸署收回。香港地肥人受人白眼，估唔到車牌都受歧視，咁又何苦勾佢哋出嚟，蝕埋5,000蚊按金呢？
mailto:[email protected]