一位美國基金經理經左丁山介紹，去年尾來港見過證券T之後，留下好好印象，呢日畀電郵邀請證券T到美國一遊，等佢一盡地主之誼。證券T一向有話直說，回電郵，云：「今年四月到AnnArbor參加大學畢業禮，之後去底特律，飛紐約，到機場排隊，飛機誤點，上機前安檢等等，麻煩到極，碰見嘅美國機場政府官員態度惡劣，令我覺得去美國旅行實在太辛苦……」九一一後，去美國旅行，人人喊辛苦麻煩，若非有家事公事，到美國旅行實在唔值得。
電腦J剛自佛羅里達州奧蘭多市回來，到廸士尼樂園一遊，猛讚奧蘭多廸士尼與香港廸士尼係牛髀與蚊髀之比，去完之後唔會再去香港廸士尼。問佢做乜咁鬼好閒情逸致到佛羅里達，電腦J講：「IBM開會吖嘛。」佢又講到奧蘭多酒店房租便宜，入住率低，似乎遇上不景氣，遊客不多。但又加多一句：「出入美國坐飛機確係辛苦，機場安檢麻煩到死，冇會開都係唔使去。」咪係囉。美國為咗反恐，對外來人士諸多限制，我哋唔去冇乜損失，損失嘅就係美國酒店旅遊界。
電腦J又講到奧巴馬與希拉莉爭出線，各自精彩，奧巴馬出身HarvardLaw，一舉擊敗YaleLaw出身嘅希拉莉，可謂精英大對決，奧巴馬贏咗會大戰越戰老將麥凱因，耶魯大學校友霸住美國白宮連續二十年，行將結束。大家見到喬治布殊笨頭笨腦咁款，大概唔多覺得佢竟然係耶魯畢業兼哈佛MBA。不過競選做美國總統之人，唔可以表現出，擺出一個哈佛精英款，要扮美國中產，有啲中西部農民feel就最啱，喬治布殊似到十足十，故此僅勝穿着漿熨潔白恤衫嘅哈佛叻仔戈爾以及大勝講吓法文，要食瑞士芝士嘅耶魯精英克里（Kerry）。奧巴馬夫婦雖然出身貧窮，但兩人都係哈佛法學院校友，莫講在黑人社會，即使係在白人之中，亦係精英中之精英，喺總統選舉對住一位貌似中產農民嘅海軍英雄麥凱因（雖則麥凱因太太來自大富人家），能否真係贏得選舉，仲係未知之數，呢場仗有排打。