一位讀者來電郵問：「克林頓究竟有幾叻？」當然係睇完六月六日本欄「與克林頓同機」之後，特別要問吓嘅。左丁山當然冇全面答案，聽大馬主Ｃ講，克林頓同佢在飛機傾咗四個鐘頭，滔滔不絕。全世界事務都識講，令馬主Ｃ大為傾服。克林頓出身於破裂低收入家庭，靠自己努力而考上華府嘅貴族喬治城（Georgetown）大學，全靠獎學金，跟住成為羅德學人（RhodeScholar），入牛津做研究，再返耶魯讀法律，結識同學希拉莉。咁嘅學歷，足以證明佢讀書零舍醒。從政後，由鄉下（阿肯色州）做到入白宮，擊敗爭取連任嘅總統布殊，證明佢政治手腕與競選手法夠晒高明。
咁嘅叻人，配合佢位叻太，點解會輸畀黑人小子奧巴馬呢？乃係太叻之過，機關算盡太聰明，當初以為贏梗，對奧巴馬防備不足，兼且夫婦兩人已經六十二歲，唔及得十六年前自己四十六歲之時，咪又係以少勝老，以弱勝強嘅道理。大抵叻人身在權勢之中太耐，就會與民眾脫節，驕橫、不聽人言矣。
近日香港有唔少人預備參選立法會，其中有冇叻人呢？當然唔會有克林頓、奧巴馬、希拉莉呢類級數啦，傳媒稱呼某人係香港奧巴馬，搞笑而已。呢日睇免費報紙，見到一條標題係「旺角捉大老鼠一炮而紅」，不禁笑到噴茶，喂，預備競選立法會議員嘅教授級人馬靠捉老鼠一炮而紅？香港傳媒嘅要求係唔係低一啲呀？立法會議員要講直選、人權、自由、經濟理念、文化認知、全港醫療保健、教育制度政策等等關乎全港、兼及佢嘅選區嘅選民意願，先至係正路。捉老鼠喎，市民打個電話去食環署或向《蘋果》報料就得啦（怕且《蘋果》記者都覺得濕碎）。如果其他有志競選之人見到「捉老鼠一炮而紅」，於是在新界西、九龍西、新界東、九龍東、港島區都興起捉老鼠之風，咁就令人啼笑皆非咯。選區議員講實務工作，選立法會議員要講多啲intellect與社會承擔，選民的眼睛是雪亮的，分得好清楚嘅。