【本報訊】不要孩子請食飯，不要領帶和手錶。囡囡的腰骨不要再彎下去，就是父親節的最佳禮物了。周先生的女兒患有黏多醣症，由可以雙腿蹣跚走路到坐輪椅代步，挺直的腰骨逐漸彎曲到70度。15年來，這位父親一直守護着輪椅上的小公主。小公主明白爸爸的痛苦不比她小，藉着今日父親節，做了張心意卡，多謝爸爸。為人子女的你，今天又會怎樣報答爸爸？記者：蔡元貴
周先生有一子一女，兒子才兩歲。父愛素來都是比較含蓄收斂，曉燕和爸爸的交流，低調到如同小情侶一樣，在家也要透過MSN溝通。曉燕說：「我鍾意同爹哋一齊上網，我一部電腦，佢一部，用MSN傾偈。」15歲的曉燕患有黏多醣症，聲帶肌肉萎縮，說話聲小，所以她愛打字跟爸爸談心。
四肢不斷咁衰退
曉燕的衰退最近惡化了。爸爸說：「囡囡個身體一路係咁差落去，四肢不斷咁衰退，近排仲成日嗌頭暈肚痛，去醫院照過腸胃，並冇異常，又冇藥物可以醫到佢。」一個學期需要上課90日，曉燕這學年就常常鬧不適，只上得40日。爸爸想找私人教師為女兒補習，但經濟負擔不來。
女兒每下愈況的病情，教爸爸牽腸掛肚：「返工時都會心掛掛，有時收到老婆電話……唉！點解個女又返唔到學？又學唔到嘢！我最擔心佢學業追唔上。」曉燕在甘迺廸中心就讀中一，除了上學，去得最多就是醫院：「曉燕一年覆診四、五次，回家的心情，一次比一次低落。最近一次，醫生話個女腰骨越來越彎，要做手術。」
為了減少愛女的痛楚，爸爸做了個冒險的決定，還要承受醫生的質疑：「醫生話，再唔做手術，腰骨壓到心肺，囡囡就好快死！」但周先生問過其他黏多醣病童的家長，知道手術會有後遺症，決定不接受手術：「醫生質問我，係唔係想放棄個女？我聽到好唔安樂，我養咗佢15年，唔通我𠵱家先放棄佢？」
做了一張心意卡
爸爸問過曉燕，想不想做手術，曉燕也說不想。曉燕比任何人都了解，這一份厚着臉硬着頭皮的父愛：「爹哋一直都好保護我，我細個可以行路嗰時，行到歪歪斜斜，成日俾啲人話，乜個細路咁㗎！爹哋會話俾啲人知，我有黏多醣症，影響行路姿勢。」
曉燕昨日做了張心意卡，在卡上畫了一顆心，還寫上幾句心意：「我想多謝爹哋佢照顧我咁耐，多謝佢冇放棄照顧我。」
父親節快樂
