倖免於政治蠢才風波嘅財爺鬍鬚曾，狂打親情牌博攞分，接受商台訪問大談兒女經，精通劍術、習武多年嘅鬍鬚曾話自己一向唔打仔女，最多係大聲啲鬧，嚇佢哋小心俾佢打到嘔電，「你哋好彩嘞，我年少時學過鐵沙掌㗎。」
鬍鬚曾話唔會迫仔女行自已條路，畀仔女自由發揮，例如個女鍾意打壁球，佢就一啲都唔鍾意。鬍鬚曾又親解留鬚之謎，佢話讀大學時，因為好多劍擊偶像都有留鬚，佢迷信劍擊好手必須留鬚，「我希望留鬚後對劍擊有幫助。」不過佢冇講留鬚後功力有冇增強。鬍鬚曾身為財爺，但佢話由細到大都冇乜諗過個人理財問題，𠵱家亦冇向仔女灌輸理財技巧，「佢哋覺得錢唔係最重要。」