拍《赤壁》遇麻煩金城武<br>男人斟--吳宇森嘆：越大粒星越謙虛

拍《赤壁》遇麻煩金城武
男人斟--吳宇森嘆：越大粒星越謙虛

導演好比戰場上的軍師，如何指揮性格不一的武將上陣殺敵，絕對是勝負關鍵。縱橫影壇三十多年、與無數荷李活巨星合作過的吳宇森當然深明此理，不過今次在內地拍攝《赤壁》卻令他感到不自在，而金城武與劇組不和的傳聞及頻生的意外，更無疑增添吳宇森的煩惱。比較中西電影的差別，吳大導得出結論—越紅的巨星越懂謙卑。
軍師回歸，有苦自知。　撰文：魯萍

涉足影壇三十多年的吳宇森，1973年執導第一部電影，至今數量接近30部，但他入行以來並不是風調雨順，一度被指為票房毒藥，直至1986年執導的《英雄本色》叫好叫座，之後拍下一系列賣座的英雄式電影，繼而晉身成為荷李活大導演，曾夥拍湯告魯斯（TomCruise）、尊特拉華達（JohnTravolta）等巨星，拍下多部大片。

接受演員意見

在荷李活拍片多年，吳宇森最近回歸祖國，執導一部成本高達7千萬美元（約5.4億港元）的戰爭片《赤壁》，這名大導坦言有點不習慣。吳宇森說：「冇喺內地拍片咁耐，有好多嘢感覺都唔同晒，喺外國拍戲，大明星都冇經理人、保母在場，𠵱家我拍拍吓戲發覺有好多人坐喺後面睇住，咁樣搞到演員緊張冇晒信心，我真係唔慣，唔知會咁煩，可能內地未試過拍咁大型嘅戲，其實越大粒嘅明星，中外都好，就越謙虛，唔難服侍。
「當然我亦遇過有啲好麻煩嘅，作為導演等於面對一門心理學，每個演員都有佢自己嘅顧慮，要保護世界市場，所以導演要有耐性、愛心，去減輕演員顧慮，明星要面對尊嚴，佢哋都會表達意見，但我唔會喺咁多人面前同佢哋對抗，唔係會令佢哋自尊心受損，事情鬧得更僵，接受演員提出嘅意見拍兩個版本，演員個心會有安全感，導演、明星都需要人關心，我唔想講邊個，香港都有大明星有呢啲問題。」
《赤壁》由籌備至拍攝，是非、意外時有發生，先有周潤發臨時辭演，後又有傳金城武對劇本有意見，與劇組人員相處出現問題，吳宇森對此說：「我都唔知點解有呢啲傳聞，金城武曾經講過喺拍戲時，大家合作愉快，我亦見唔到佢同工作人員唔啱，大家簽咗合約，9月中佢要拍一部日本片，所以要先跳拍佢啲戲份同群戲，佢都了解大家因為佢而趕戲，遷就佢時間。如果佢對劇本有意見就唔會接拍，我從來都唔會勉強人，有意見我會跟住改，但我冇聽過佢有意見。」

在荷李活拍片多年，最近回歸祖國拍片的吳宇森，坦言不習慣。

吳宇森除了擔當導演的重責外，原來也要充當心理輔導員，為演員排解顧慮。
《壹本便利》圖片

欣賞發哥徐克

至於有傳劇組批評金城武麻煩，吳宇森笑笑口說：「我唔知，每個人有自己性格，佢覺得有問題提出意見，我唔覺得有乜唔妥，每個演員間中都會有意見，我乜嘢明星都拍過，間中會有類似情況發生，導演尊重演員，唔會表達出嚟要人難堪。」
戲迷都期待吳宇森再同周潤發合作，但發哥辭演《赤壁》，可會令兩人的關係起了變化？吳宇森認為大家關係沒變，還是會照原定計劃合作《華工血淚史》一片，他說：「感情冇影響，我唔係要講漂亮說話，之前拍《英雄本色》嗰時，已經好欣賞周潤發嘅演技，佢係一個出色演員，大家有共通地方，之後互相了解，我對佢嘅欣賞，係真正嘅欣賞。
「好似我同徐克喺創作上有唔同意見，但我依然欣賞徐克，三十幾年前徐克拍電視劇《金刀情俠》，睇到第二、三個畫面，已經覺得呢個人非常有才華，好了不起，我同徐克見面後一見如故，我幫佢手喺新藝城拍佢第一部戲，到我失落、唔掂，變成票房毒藥嗰陣，佢一直支持我，一齊搞《英雄本色》，大家惺惺相惜，感情非常好，到後嚟因為大家喺製作上有分歧，於是決定分開拍，觀眾仲可以睇多啲唔同嘅戲，同發仔感覺係一樣，大家唔會因為小事反目成仇，相信佢都係咁諗。」
吳宇森續說：「等於點解我要拍《赤壁》，以前睇古裝大片，有好沉重嘅歷史負擔，充滿仇恨，人生已經夠麻煩唔開心，點解仲要搞啲唔開心嘅事，所以《赤壁》係一部樂觀嘅電影，我將自己性格，真正感情、感受全部投入去，如果要咁計較，拍《赤壁》已經變得好冇意思。」
自辭演事件後，他未有再和發哥聯絡，吳宇森解釋：「我同佢冇聯絡，各有各忙，大家心照，有啲事唔係我兩個人之間可以控制，有好多客觀因素，拍一部戲已經好辛苦，兼顧嘅嘢實在太多。」

《赤壁》開拍以來波折重重，幸而梁朝偉和金城武演活了周瑜及諸葛亮，令吳宇森放下心頭大石。

周潤發與吳宇森縱然在拍片時偶有分歧，但也無損兩人深厚的友情。

吳宇森與徐克合作的《英雄本色》不但令他吐氣揚眉，狄龍更憑該片贏得金馬獎最佳男主角。

林志玲有天份

因為角色調動，當初屬意周潤發演的周瑜，最後改由梁朝偉演，原本由偉仔演的諸葛亮，又變成金城武擔演，導演花了一個多月時間去修改劇本。對於梁朝偉與金城武的演出，他說：「偉仔做得非常好，好適合做呢個角色，周瑜文武雙全，性格浪漫，為人有胸襟，偉仔演活周瑜，有一份瀟灑、魅力，我知道佢花咗一段時間去揣摩角色，金城武做得好活潑可愛。諸葛亮有理想，為人幽默，周瑜對朋友重義，對妻子有愛，兩人商量計策，令我諗起保羅紐曼（PaulNewman）同羅拔烈福（RobertRedford）嘅《TheSting》（老千計狀元才），出嚟嘅畫面，觀眾一定會覺得好靚。」
對於片中各演員的表現，吳導演就多番稱讚林志玲，似乎是情有獨鍾，他大加讚賞說：「林志玲少經驗但好用功，花半年時間喺北京學演技，佢好穩重，好靚，我睇到佢係一個好有演戲天份嘅人，電影圈要多啲新面孔，佢有一種親和力、吸引力，個人好坦誠，其實所有演員都好認真，可能機會難得，所以個個都有所表現。」

吳宇森對林志玲在《赤壁》的表現，大加讚賞。

話你知：回歸祖國　重振聲威

吳宇森92年拍罷《辣手神探》之後，正式進軍荷李活。首部作品是與尚格雲頓合作的《終極標靶》（HardTarget），全美勁收3,253萬美元（約2.5億港元），成績總算有交代。其後他留守荷李活，轉而執導電視版《縱橫四海》，努力打入美國電視圈，並於96年憑電影《斷箭行動》（BrokenArrow）重拾風格，翌年的《奪面雙雄》（Face/Off）更大放異彩，成功在美國收得1.12億美元（約8.75億港元）的票房紀錄，終於闖出名堂，之後更獲湯告魯斯（TomCruise）賞識，邀請執導《職業特工隊2》（MissionImpossible2），全美共收2.1億美元（約16.38億港元）票房，但口碑麻麻；其後的《烈血追風》（Windtalkers圖）及《致命報酬》（Paycheck）成績更慘淡，吳宇森只好回歸祖國，重新執導華語片，希望一洗事業的頹風。

《奪面雙雄》貼錢加戲

拍《赤壁》這部史詩式巨製，吳宇森投入部份資金拍攝，雖然他不願透露實際金額，但據聞是5百萬美元（約3千9百萬港元），問到甚麼原因使他投入資金拍攝？
吳宇森說：「因為出咗啲意外，搞到先前嘅計劃亂晒，超出預算，就要減戲控制成本，但好似趙子龍救阿斗一場咁重要嘅戲，冇理由刪，戲必須拍，自己就投資落去，啲人以為我拍西片搵好多錢，其實我好儍，拍《奪面雙雄》（Face/Off）時我想加一場戲，原本劇本冇，係個小朋友喺槍林彈雨下聽歌（圖），電影公司話冇錢，咁我咪自己畀錢拍，公司睇咗好鍾意，之後部戲賺錢就畀番筆錢我。
「我唔想大家洩氣失望，錢我唔計較太多，最緊要係拍出嚟，全世界矚目，我唔係乜嘢大導演，可以攞錢出嚟玩，我想畀到年輕人鼓舞作用，心願係拍好電影，畀多啲工作人員學經驗，知道喺美國點拍戲。」