有競爭先有進步，得益嘅梗係我哋啲消費者啦。話說廉航AirAsia（亞洲航空）上月首辦香港來往吉隆坡嘅航線，單程機票99蚊，搞到馬來西亞航空頭都大晒。馬航早幾日咪出手迎戰，仲係一炮雙響㖭，分別係香港直航吉隆坡單程機199蚊至339蚊，直航沙巴亞庇（KotaKinabalu）仲係「零機價」至399蚊。咁鬼吸引，小妹咪打電話去馬航八吓囉。
未計燃油費及稅項
馬航發言人話，正常票價以7月份計，香港到吉隆坡來回機票價係2,350蚊，來回沙巴就要2,370蚊。不過，今次優惠機票未計燃油附加費同埋相關稅項。小妹都知廉價機票一定唔包燃油附加費，但去沙巴零機價，加埋附加費等雜項，都係要500幾蚊啫；去吉隆坡機票連稅都係1,000蚊，都好抵搭。最驚純粹做場Show，冇乜位啫。
發言人唔肯透露廉價機票限額，只係話暑假期間部份日子仲有廉價機位。訂票方法要去馬航嘅網址 http://www.malaysiaairlines.com訂購，預訂日期即日起到6月22日，出發日期係下月15日到12月14日。
小妹想去沙巴，噚日即刻上網check機票，7月啲平飛爆晒，8、9月個別日子都有，單程最平240蚊；10月至12月最平有40蚊。暫時搵唔到零機票，真係手快有，有慢冇。
廉航專家季霆剛話，馬航做到咁平抵到爛，起碼服務都好過啲廉航啦。以前都去過亞庇玩，參加localtour去熱帶雨林區玩激流，「嗰度啲海鮮即捕即食，最正係石斑」。
電郵：mailto:[email protected]
逢周六、周日刊出