不須認還須認，啲副局長與政治助理已被迫和盤托出佢哋啲私隱──入職薪酬。早知今日，何必當初呢？特區政府主其事者，實在要檢討吓自己啲政治公關方法以及三省政治化妝術。有時候，IQ爆棚之人，做事並不聰明，原因好簡單，機關算盡，終不及大智若愚，有化妝不如冇化妝，老老實實，循規蹈矩，先至係無招勝有招。
薪酬猶是小事，國籍先至係大事。雖然基本法冇講明副局長持外國籍是否違法，但中英聯合聲明附件一就有提及主要官員之副職不能持有外國居留權，在事事講究政治正確嘅時候，素來在國籍問題上為曾特首護航嘅愛國報紙完全唔出一句聲支持政府，大家應該知道係乜事。星期日在馬場廂房聽到一位接近權威人士講，北京正為震災、京奧、通脹忙個不休，唔想出聲出手，勉強由中聯辦出聲話外籍副局長不違反基本法，實則上北京頗有微詞，曾特首班子以後要醒目啲喎。
有外國籍、護照是否對本港不忠，好難講，留學外國好耐之精英學生，話冇外國居留權都冇人信。持外國護照不一定不愛祖國，誓死保護毛主席之人又未必真係愛國，總之人人不同，各如其臉焉。
睇歐洲國家盃，國籍與愛國扯不上邊。德國贏波蘭二比○，射入兩球嘅普多斯基（Podolski）就係波蘭出生嘅波蘭人，因入咗德國籍而代表德國隊，打波之日，普多斯基家人親戚自波蘭揸車去瑞士睇波，睇住自己國家隊畀普多斯基與另一個德國籍波蘭人高路斯（Klose）合作打垮咗，不知有何感覺呢？有不少中國乒乓球好手僑居外國後，憑球藝取得外國護照，在國際賽與奧運有機會與中國選手碰頭，輸多贏少，偏偏曾有一位姓何（好似叫做何智麗）嘅女將代表日本曾經打贏中國對手，被內地人罵為漢奸，以此推論，普多斯基仲唔係「波奸」？但高路斯與普多斯基冇畀波蘭人痛罵，德國人亦放心派兩位波蘭人落場對波蘭，可見歐洲人想法確係與中國人不同。三十幾年前基辛格對毛澤東嘅翻譯唐聞生講：「你可以在美國競選總統，我則不能！」可謂極其幽默，（按：唐在美國出世，基辛格在德國出生）。