噚日凌晨時份，我求大俠連踩完兩場歐國盃B組賽後，天旋地轉，半夢半醒間腦海浮現一個人舞動兩面國旗，一面係克羅地亞、一面係奧地利。睇清楚，嗰個人係艾維卡華斯廸（華斯廸）。
出現呢個景象，相信係同當日克軍挫德國威到盡，而幫奧地利入波保一絲出線希望嘅華斯廸，本身係克羅地亞人有關。如果我話當日係克羅地亞威水日，應該冇人反對。事實擺在眼前，今屆啲「移民」球員影響力甚大，先有普多斯基、高路斯玩謝祖國波蘭，而噚日凌晨為波蘭攻破奧地利大門嘅羅渣古里路就係巴西歸化兵。
事隔10年再為奧國建功
不過，點計都係華斯廸最矚目，話晒佢為奧地利對波蘭補時射入12碼後，以38歲高齡成為歷來最高齡嘅歐國盃入波球員。仲有，唔講唔知，原來奧地利對上一個大賽係10年前世界盃，當年邊個有份入波？咪又係華斯廸囉。奧地利教練希克斯貝加賽後話，當華斯廸上前主射，就認定99.9%會入，對後者好有信心咁話。唔知下場對德國嘅生死戰，呢位老將會唔會再建殊功？
賽前有酒商開聲話邊個球員今屆為奧地利開齋，就一世請佢飲啤酒，但奧地利足總日前以商業理由作出禁止，令華斯廸享受唔到呢個額外獎賞；唔緊要，話晒呢個生於克羅地亞嘅人屢為奧地利建功，係國家英雄，佢去到邊都大把人請佢飲飲食食啦。
講開又講，奧地利有呢位福將壓陣真係唔同啲，同係今屆賽事東道主，禮拜三瑞士就補時失波輸俾土耳其，成為歷來最醜嘅歐國盃東道主；翌日奧地利就補時扳平，至少呢刻都叫做未出局。邊個國運好啲，唔使多講啦啩？