HP每年一度「嚴重」新機發佈會，舊年在上海、今年就移師德國！未上機PR先報數──新Notebook都有18部（老編馬上嚴重警告要小心字數）！殺抵柏林市中心BCC展場，新機有多冇少，當中最搶係HP旗下強勢品牌Voodoo嘅ENVY133，連德國早晨新聞主播兼司儀ChernoJobatey都大讚：「攞上手好似輕過空氣（AIR）！」此語一出，600位全球記者都知佢衝着「乜BookAIR」而來，馬上帶大家睇佢係咪輕到連風都吹得起！
記者、攝影：朱崇德
玩碳纖贏在唔怕撞
攞上手，同「乜BookAIR」一樣，差唔多A4度（32.2×23cm）、放得入公文袋！厚度冇偷位，行方正平均1.79cm厚，相對欖核形AIR、玩蠱惑的0.4-1.94cm，論體積真係不相上下。好嘅係Windows玩家，終於光明正大一開機係Vista！
規格明顯係睇住嚟打！睇齊地一樣玩IntelCore2Duo1.8GHz或1.6GHz（4MBL2Cache）處理器任揀，顯示屏同為13.3吋（1,280×800）、LED背光，配埋個64GBSSD或80G硬碟，話佢唔係孖仔都好難！唯一改進點係外殼使用更硬淨唔怕撞凹變形嘅碳纖，唔好以為佢齋玩鋼琴焗漆咁膚淺呀！
價位開勁抵US$2,099（約港幣$16,372）。展會開初話明亞太區唔返貨，不過中港韓星四地記者個個好似自己買機咁，喪問點解我哋冇得玩？最後亞太區負責人表示要嚴重考慮！IT記者對白鴿眼都睇得中，唔筍又點會迫得咁緊吖！值得期待！
手指指兼睇電視
搵到22吋特大LCD嚟做一體式電腦？現場睇HPTouchSmart真係巨到有啲過份！照行IntelCore2Duo、4GB記憶體、內置WLAN、無線Keyboard，簡約到只要插機尾一條電源線就開機用得，絕對係初階用家恩物！更過份係22吋巨屏竟然係TouchScreen設計，機身仲內置專用軟件，可以俾你手指指播歌、睇相裁相、查天氣……翻開機尾，竟然仲有TVTuner睇埋電視！暫知售價US$1,399（約港幣$10,912），亞太區6月底前到貨，又係期待作。
最齊料3G手機
今次新機發佈，連手機都有份！所指係同系最重手齊料嘅iPAQ912BusinessMessenger3G，QWERTY鍵盤配WM6.1Professional，基本三頻UMTS/HSDPA、四頻GSM/GPRS/EDGE無線技術全部齊全，兼內置藍芽、Wi-Fi，影300萬像素相片，真係齊料到冇得挑剔！機價US$549（約港幣$4,282），9月亞太區上市。
HP×MTV玩潮Look
好多人仍停留喺HP嘅實用商務舊形像，睇過上面產品發佈都應該可以另眼相看！再睇呢部舊版DV2000，話說半年前同MTV台搞咗個外觀設計比賽，得獎設計實物機在展會上終亮相，價錢未知、香港可能都冇貨！好潮、好日本Look、好想要！據知遲啲台灣可能返貨，昅實嗰邊官網在所難免！
鋁×鎂大騷強硬
EliteBook6930p都可算係記者見過最Tough嘅NB，咪睇佢氧化鋁外觀塗層，就以為佢齋賣相頭咁無聊，其實機身內裡鑲嵌咗鎂合金骨架。展會上Show料時，癲到用砂布省機面都唔花，甚至喪用手指𢱑反而指甲都磨咁截！骨架結構亦比一般NB硬80%，據知一個成年人企上去都冇問題。處理器行最新流動級AMDTurion64×2UltraDual-Core或IntelCentrino2，機價為US$1,179（約港幣$9,196）7月底前上市。
10億色LCD神兵利器
當一般LCD普遍仲行緊千萬顏色，HP突然爆出DreamColourLP2480zx，行10億色、30-bit、LED背光，相當於一般LCD的64倍色彩表現能力。設計原意念來自DreamWorks夢工場在製作動畫上的需要，現在竟成為消費性產品，連夢工場動畫首席技術官EdLeonard都話佢嘅色彩，勁到係最原色表現，係數碼電影製作人最夢寐以求神兵利器。售價US$3,499（約港幣$27,292）。
強到連色溫、光度、RGB範圍都可以手動調校。
大電視變身電腦睇片
42吋、47吋LCDTV真係一街都係！對應埋1080p又如何？但筆者都要寫呢部HP出品嘅MediaSmart，原因係機背竟發現一個LAN插口，只要用佢經Router連上任何WindowsMediaCenter電腦、Notebook，你就可以用電視遙控隨時Call出電腦周邊內的相片、電影或歌曲。
為高清水冷超頻
Voodoo又發功！今次玩水冷Tower主機──OMEN，今次話明為Blu-ray、HD影片而起！底版、卡槽、RAM呢啲大路水冷位走唔甩，不過最醒係加入6隻HDD水冷包箱，想自製、自錄包冇問題。
展場花絮
十度頭德國夏天清晨、7:30am、曬住太陽、吹住亁風、排隊等入展場，辛苦？熱定凍？問番自己都唔識答！
