立法會議員金勞詹言論出位，曾經講過十個女人十個係雞，咁囂張嘅言行香港政壇搵唔到第二個，長江後浪推前浪，金勞詹同八方講，近日佢終於見到一個可能仲寸過佢、囂張過佢嘅人，就係新加坡人、財經事務及庫務局局長政治助理伍潔鏇。
金勞詹話日前睇電視直播政治助理記者會，見到呢個坡妹態度好似頗為輕佻，聽到佢牙斬斬咁話自己係香港人，但又唔願放棄新加坡護照，更聲言隨時可以攞SARpassport特區護照，囂張表情令人側目，金勞詹話如果呢位坡妹堅持做香港人卻唔捨得外國籍，不如劈炮唔撈，何必留喺特區政府？金勞詹又話，做政治任命官員應該一心一意效忠中國，一女侍二主，成何體統？
八方一啲官場朋友則話，覺得伍潔鏇喺記者會上表現幾好，勇於表明立場十分硬淨，佢又講笑咁話，政府多個「辣妹」都唔係壞事。新加坡一黨獨大，連溫總都認為香港要多多學習，有個新加坡人加盟政府，難怪煲呔求之不得。伍潔鏇係香港渴求嘅政治人才，有新加坡撐腰，佢怕乜咁囂張？
新加坡人咁囂張令金勞詹睇唔順眼，高齡政治助理盧奕基都篤眼篤鼻，金勞詹指保安局工作敏感，冇理由容許一個雙重國籍人士做政治助理，佢指如果伍潔鏇同盧奕基日後到立法會，好大機會俾議員糟質到體無完膚，祝佢哋好運。
有人勸佢適可而止
金勞詹同煲呔交手多年，睇住副局長制搞到一鑊粥都不無感慨，佢話煲呔係醒目仔，政治手腕超凡，今次失手，唯一解釋係「撞邪」，否則唔會進退失據難以收科。佢又指煲呔「登基」後，以為真係可以強政勵治，唔記得呢句只係競選口號，講講吓自己都信以為真，聽唔到旁人意見，落得如斯下場都冇得怨天尤人。
民主黨繼續狙擊煲呔，9月選舉前都咬住唔放，金勞詹透露有人勸佢「適可而止」，暗示佢應該收口唔好再批評，事關煲呔已經道歉，無謂打落水狗，佢唔肯透露邊方面人士「勸」佢，只係話自己冇有怕，今個月廿幾號仲會同煲呔及陳德霖食飯，屆時唔知煲呔會點樣「招呼」呢位老友呢？
mailto:[email protected]