喺蘇黎世識到嚟自保加利亞電視台做評述員兼資料搜集嘅華拉度（Valado、圖），即足球節目嘅「一腳踢」；初初以為佢同雷民一樣可以去唔同球場為賽事採訪，點知原來因為保加利亞入唔到決賽周，當地電視台即刻縮沙，只有「PayTV」先至有得睇歐洲國家盃，仲要用大會評述，又冇賽前賽後嘅雜誌式節目，咁華拉度嚟到淨係搵資料。
保國工作證遭人白眼
更加攞華拉度條命就係連賽會都視佢為「二等傳媒」，將佢個採訪證列為「NotValidonMatchDays」（即比賽當日無效），每逢比賽都只可以喺新聞中心睇電視；你話遠道而嚟得到咁嘅待遇，係咪認真冇癮呢？所以佢不停話保加利亞1分之微輸俾荷蘭出唔到線，損失好慘重。
佢話保加利亞球迷家陣想睇多啲歐洲國家盃嘅資訊都冇，國內冠軍索菲亞中央陸軍仲要因為財政問題冇得踢歐聯，聽華拉度講到呢度，連我個心都灰埋。
仲記得保加利亞喺94世界盃打入4強，而家球隊成績唔好連帶球迷同傳媒都受影響，所以你話入圍決賽周幾緊要！香港球迷就幸福得多，可以由朝睇波睇到晚，仲不停有最新嘅歐國盃消息，香港真係足球天堂。
文：雷民