玩慣咗5.1聲道，呢輪轉吓口味，搵咗個friend幫我砌咗部兩聲道膽機聽歌，啲聲同原子粒擴音機好唔同，人聲真係好甜好圓潤，老土啲講句真係「高音甜、中音準、低音勁」。砌部機都唔平，未計人工，單係膽管用料等都成五、六千蚊，但比起外國品牌閒閒哋兩萬幾蚊，平咗好多。
𠵱家大陸都出咗好多膽機，價錢兩、三千蚊有交易，好似深圳華強北路咪係膽機嘅集散地，但質素參差。想平平哋學玩膽機，又唔想山長水遠返大陸碰運氣，本地都有啲公司代理內地膽機。小藍早幾日去咗老友周革生油麻地MK1間舖悅昇多媒體，試聽吓啲國貨膽機。
周革生話，𠵱家好多30幾歲中產想玩膽機，又驚貴得滯，公司咪代理啲入門級國貨膽機，平到1,230蚊至3,100蚊，「喺呢度買機有保養，質素比大陸買機有保證。」佢話，主要代理溫州嘅升藝（Shengyi）膽機。每款膽都有唔同個性、味道，播出嚟嘅人聲好唔同。
好似MINIP1型號用大陸膽，人聲滑潤細緻，所謂少女聲；MINIL3用俄羅斯膽，人聲更柔，「呢款機最受歡迎，女人味十足。」鍾意交響樂可考慮XD800MKIII，用咗美國膽，聲音澎湃層次分明。本身有原子粒擴音機又想玩膽機，咪配一部膽前級，力水加大咗，又有膽味。
小藍即場試聽，播一首發燒天碟童麗嘅紅燭淚，嘩！啲人聲溫柔婉弱，搞到行過嘅巴士阿姐走埋嚟聽，猛話啲聲好鬼舒服，要買番一部。
逢周五刊出