「難求緣份至，難求全合意，始終都有第一次……」已故嘅哥哥名曲都有得唱，人生咩都總有第一次。周二韋拿嘅「第一次」，就係喺歐國盃D組首戰大演帽子戲法，幫西班牙大炒俄羅斯4:1。賽前韋拿「神射手」賠率有成16倍好鬼好分，入完3粒之後熱到得番1.8倍。仲值唔值得入市？唔係仲追呀細路？
韋拿喺周二場波狀態確實唔錯，後上支援嘅恩尼斯達同大衛施華都畀足彈藥，前線拍檔費蘭度托利斯（F托利斯）亦唔獨食，造就韋拿首次喺國家隊連中三元。
決賽周前，足智彩都唔係咁睇好韋拿，「神射手」開到成16倍咁好分，嗰時入貨當然抵博。𠵱家韋拿入完3粒，賠率即升至1.8倍大熱，如果仲入市就唔理智喇。
事關睇番周二場波，西班牙教練阿拉干尼斯上半場打4-4-2，下半場又轉打番4-1-4-1單箭頭戰術，總會影響前鋒出場機會。韋拿呢場波「弗」啫，唔代表下場F托利斯冇料到喎，陣間呢位9號仔又入番3粒，嗰邊德國暫入兩球嘅普多斯基又整幾粒，好易過韋拿頭㗎咋，1.8倍實在太熱！
問過F托同普多斯基未？
周二晚除咗韋拿，原來仲有好多「第一次」！好似希臘就係歐國盃決賽周改制16隊後，首支喺翌屆分組首戰冇分落袋嘅衞冕隊；至於西班牙4:1贏俄羅斯，又係今屆首場兩支隊伍都有波入。仲有呀，瑞典2:0贏希臘場波，先開紀錄嘅伊巴謙莫域繼05年10月幫國家隊入過波、足足成14場國際賽冇「士哥」後終於再度建功，當晚係咪好多「第一次」呢？
你的意見?
●你認為韋拿能否順利成為今屆歐國盃神射手？
請上 http://hk.myblog.yahoo.com/appleballmen/〈球蘋家〉留言