歐洲國家盃於上星期六深夜開鑼，本應好戲連場，但弊在每場開波時間都在午夜十二時及凌晨兩點四十五分，點睇呀？睇完都唔知第二朝點會有精神返工，左丁山唯有放棄，預備只在星期六凌晨睇番一場勢均力敵嘅，例如六月十四日早上兩點九嘅一場大戰荷蘭對法國，而唔係開波第一場瑞士對捷克嗰種，葡萄牙對土耳其亦唔值得我哋睇到捱眼瞓。左丁山估荷蘭贏波。
不過上星期六晚上八點左右，睇中國對卡塔爾，本來係海軍鬥水兵，不值一觀，但畢竟係世界盃外圍賽，中國有主場之利，贏波賠率在兩倍以下，而客勝（卡塔爾贏波）賠率有五點幾倍，左丁山實在覺得應該下注於客勝，但賭波買中國輸？總係覺得有點兒那個，買中國贏，又覺得主勝賠率過低，最後決定唔落注，睇波算數。哎吔，中國十三億人，選十幾個球員出嚟，水唔水啲呀，最後真係輸咗○比一，四戰得三分，在亞洲第一組排第四，睇怕冇希望出線咯。呢組澳洲與卡塔爾同得七分，伊拉克有四分，中國餘下兩場要贏澳洲及伊拉克，未免大想頭一啲，何況事後更傳出謠言，話中場防守球員周海濱賽前在更衣室被人圍毆，雖然國家足球隊否認，總係顯示出中國國家足球隊內部一團糟，烏煙瘴氣。
中國體育在世界上有名堂，籃球在亞洲稱霸，輸畀美國與西班牙、阿根廷等球隊冇得好講。但偏偏在世界上最重要嘅球賽──足球，成為世界魚腩，甚至係亞洲二流隊伍，對住日本南韓澳洲及中東球隊，總係輸多過贏，今次在天津有主場之利，竟然輸埋畀卡塔爾呢個小國，究竟發生乜嘢事呀？中國北方球員睇落唔多掂，原因不明，人地南韓有朴智星，日本有中村俊輔等當打球星，分別在英超、蘇超揚威，中國點解培養唔到半個以至一個咁好波嘅球員？一個釜底抽薪嘅辦法就係將國家隊所有中國教練、訓練員炒晒，請十個八個德國教練、體能專家、領隊等全權主理國足。德國人識足球，對人對事亦十分公正嚴明，不會感情用事，希望借助外國人嚴格訓練之下，國足可以在2014年世界盃外圍賽出線。