闊別擁躉足足三年半，絕非外傳嘅掛正牌《MetalGearSolid4》終於響本周出爐！雖然執筆時仲未知向來強悍嘅SolidSnake係咪要戰死沙場從此引退，畀條路班後生仔行吓；但揸Fit人小島秀夫一早爆晒響口，話今次真係蛇叔嘅最後戰鬥，難怪日本權威Game書《Fami通》以至部份外國媒體都畀佢滿分，搞到𠵱家唔理係咪Fans都好，總之有PS3唔玩就真係Out到爆，甚至「終身抱憾」咁誇！
文：陳福榮
Model：Pheobe
新舊角色共冶一爐
或許係要幫蛇叔光榮引退啦，今集有意無意咁包含咗歷代角色，例如俾宿敵Liquid上咗身嘅Ocelot、第一集曾經共同進退嘅Meryl、華裔靚女通訊員美玲、第二集另一男主角雷電與其女友Rosemary、打不死嘅恐怖殭屍Vamp、上集搞到蛇叔老竇神魂癲倒嘅一代尤物Eve等，仲有變晒做機械兵嘅波士級角色「四大女魔頭」，咁多舊朋友似開P多過打機！咁遊戲副題「愛國者之槍」又係乜東東？由於喺美國政府背後係有班愛國者負責監視，身體基因產生急速衰老突變嘅蛇叔，為咗對付呢班攪屎棍同埋Ocelot，於是拚埋條老命上戰場，潛入中東調查點解當地有新嘅基因兵。睇見預告片兩部MetalGear打成一片，肯定蛇叔同Ocelot唔係你死就係我亡！
趣味點子層出不窮
《MGS4》遊戲系統沿用第二同第三集嘅精髓，以不被敵人發現嘅潛入行動為基礎，CQC與保護色服裝依然健在；光學迷彩方面亦進化成即時與周圍景物同化，驟眼睇根本發現唔到。最令Fans開心都係小島秀夫喺圈中難得嘅電影式幽默感，大量Gag位令人報以會心微笑，好似集集都有份嘅瀨屎仔Johnny，居然成為Meryl嘅隊員幫手拆炸彈！武器更可隨時購買，但錢從何來？原來打敗敵兵即可喺佢哋身上執錢，認真搞鬼！
正式進軍網上行列
為滿足多年前心願今勻終於正式啓動連線互片功能，將名為《MetalGearOnline》嘅試版塞入《MGS4》，用番後者個圖象引擎與一切功能變成另一款網上遊戲，暫時睇都算做得唔錯。據知正式版將徵收若干費用，唔想使錢都可以齋玩試版體驗一下網上樂趣。
另外，《MGS4》亦破格做到歐美日版本同步推出，本地行貨引入日文版同英文版，雖然講英文嘅蛇叔未必個個聽得慣，但由於價錢差距成百蚊，令此版本更有競爭力。唔單止咁，為擴闊市場仲搞咗好多Crossover，如推出Uniqlo限定Tee、特製鴨仔鬧鐘等。咁美國方面花臣嘢又點？原來遊戲中部份物品會跟隨版本而變，如日版南明奈寫真集英文版就改成《花花公子》，武器商人隻馬騮仲會飲其他牌子嘅汽水㖭！
英文版執到嘅成人刊物係《花花公子》而非南明奈寫真集；即食碗麵就兩個版本都有。
FullHD+5.1=殺晒
一早知《MGS4》擺明係晒機能嘅超級大作，為求完美製作小組將其押後差不多一年。《蘋果》今鋪飲頭啖湯率先試玩，即刻情商高清器材專門店，喺百幾吋嘅投射銀幕同5.1環迴立體聲環境享受蛇叔最後一戰。真係唔好講笑，行咗1080p輸出畫面嘅細緻位清楚易見，唔單止建築物內外每處嘅紋理好清晰，音響效果亦做得好出色，臨場感十足恍如睇緊電影咁實在！當然全不經由CG加工嘅劇情交待場面，令本作更似睇緊一齣打仗西片，就算唔親自玩、齋睇人試都好鬼興奮。每個細節都做到咁堅，唔怪得享譽全球嘅揸Fit人小島秀夫，連健力士紀錄都拎埋咁巴閉！
大讚「蛇叔告別戰」！
著名遊戲撰稿人傑特
「水準高到嚇死人，最令我感動係細節位好花工夫，呢啲係用錢同大容量整出嚟嘅精細，絕對係不惜本錢嘅大製作。但似乎欠缺驚喜！」
《G-Zone》編輯豬頭
「戰爭場面逼真到暈，佢個中東版圖極有真實感，令人感受到百姓喺槍林彈雨下嗰種無奈。難度依然唔太低，想每度都全身而退未免唔太可能。」
機種：PS3
廠商：Konami
類型：ACT
人數：1人（網上連線16人）
日期：6月12日
售價：$418（行貨英文版）、
$528（行貨日文版）
鳴謝：龍勇（香港）有限公司
場地：HiViHK.COM（23616176）
有着數！
收到風《MGS4》應趕到呢兩日殺入香港，由於貨源唔多，代理話必掀炒風。《蘋果》讀者今勻有着數，只要喺本周五（6月13日）1:00pm起，攜同本版到深水埗黃金商場26號舖金城遊戲，即可以優惠價$380買到。限量100隻，先到先得。
‧必須憑本版報紙才可以享有優惠。