去現場睇大賽，梗係要買番多少紀念品，2000年自費去睇日韓世界盃，覺得當地並唔係有好多精品，原本導遊話場外有唔同球隊嘅波衫或T恤，去到韓國竟然係無，得「行貨」一大堆，仲要場場一樣，心情即刻都有啲失望。不過今次歐洲國家盃就唔同啦，歐洲人對足球文化相當熟悉，場內的紀念品店閒閒地有十間八間，行幾步就有一間，真係好難忍手。
東歐美女硬銷T恤
每場賽事獨有嘅T恤，印上對賽球隊國旗，又有日期，絕對獨一無二，又迎合「到此一遊」嘅意思，每件要25歐元，接近300港元，不過如果買球衣，就一定係香港平啦！一件克羅地亞嘅格仔戰衣，要70歐元，800幾港幣，香港買兩件都得啦，所以雷民以後都只會集中買T恤，未來我就會出盡力畀錢掃貨。
紀念品店T恤精美外，都出動美女攻勢，每間都實有一位東歐美女，吸引人之餘亦方便繙譯，好似呢位就係來自波蘭（圖）啦！
文：雷民