3招變靚樣　慳$16,150

去超市明明諗住買一支豉油，買兩支平兩蚊？梗係買兩支啦！唔好話我師奶貪着數，精打細算，慳埋慳埋年尾應該夠入幾升油啦！乜話？又有着數？MINICooperSExclusivePackage？換雙天窗車頂、Xenon頭燈同全車磚紅色皮Seats，Options原價本來要5萬，家陣新車價加3萬幾就齊料。慳一次，咪夠買幾年豉油？仲豉油？部車咁型，揸出街食啦！

撰文：嘴嚼爺
攝影：譚盈傑
Model：Monique

原廠裝身有保證

喺街見到好多鬼五馬六嘅MINICooper，喺車頂噴個章，再唔係拉格仔花，馬戲班咩？各人有不同喜好，我就唔識欣賞喇！都係S版有型，17吋胎軨、車頭入風口、車尾中置孖喉，家陣ExclusivePackage有埋雙天窗，車頂拉花都唔使諗，真係靚仔到唔使再改。外形上，呢個着數版MINICooperS，只係換咗Xenon頭燈。你可能會話：換Xenon頭燈出面平好多吖！不過原裝料靚而且手工有保障。原裝Xenon夜晚光得嚟又唔刺眼，似對大眼睛咁精靈！計埋條數你睇，全套3樣Options：雙天窗車頂$19,800、Xenon頭燈$18,150、皮Seats連皮櫳$13,200，加埋$51,150，家陣車價加$35,000就有齊，慳$16,150。有心買MINICooper，仲要S版，證明你有要求，呢3萬幾，抵畀！

第1招
Xenon頭燈光猛唔刺眼，原裝有保障。

第2招
有咗雙天窗，細車都即時好有空間感。

第3招
仲有磚紅色皮櫳，紋理精緻如復古梳化。

懷舊部屋Feel

一坐入車，我就有種入咗間懷舊部屋嘅感覺。磚紅色皮Seats，成張古典梳化咁，唔係原裝好難做到咁Fit。好坐之餘，我覺得可以令成架MINI即刻Sharp晒。之後望望中控台個電鍍邊大錶板，似足屋企掛牆嗰個舊款時鐘？按鈕仲係撻上撻落嘅電鍍掣，的骰精緻得緊要。抬頭一望，雙天窗令車廂好光猛，人都精神啲，嗰種開揚感覺比得上開篷車，仲唔會吹亂頭髮。雖然車廂細，但都無侷促，假日遊車河必備。見過呢款皮椅同雙天窗車頂，已經無得返轉頭，你要我買齋版？我情願努力啲儲錢。MINICooperS好玩，而且好快。175匹馬力，0至100km/h只要7.1秒，仲有6前速加減波。唔係第一次試，不過強勁加速力配合尾喉傳來嘅轟轟聲，依然令人享受。喺路中穿插時，我諗起昨晚睇歐洲國家盃，德國隊如果多一個如此矯捷快速、走位靈活嘅翼鋒，何止炒波蘭兩球？