香港殿堂級搖滾樂隊Beyond，經歷三年多的風雨，前日藉着紀念逝世15周年的主音黃家駒，三子再度同台舉行音樂會，一曲《海闊天空》把過去的是非一掃而空，黃家強、黃貫中與葉世榮在近萬觀眾的喝采聲中，向樂壇搖滾鬥士黃家駒致敬，家強在台上更感觸落淚，希望將亡兄的音樂精神延續下去！
黃家駒逝世15周年，Beyond三子前日在其生忌舉行「別了家駒十五載…海闊天空音樂會」，今次是Beyond拆夥超過三年後首度合作，意義重大，fans也對這次Beyond重組反應熱烈，不時企上凳及多番衝到台前，令家強多次呼籲觀眾返回座位。
「家強撐得住」
葉世榮甫出場即與家強來個擁抱，世榮說：「今日大家咁支持Beyond，家駒喺上面見到都會好開心，證明冇人忘記我哋，我好明白失去親人感覺，15年來明白家強心中痛苦，我哋係一齊成長，家強撐得住，佢好堅強！」現場又播出家駒的歌聲，家強隔空與哥哥合唱一曲《衝上雲霄》，現場播出兩兄弟一些片段，這時家強已忍不住喊出來要抹眼淚。
其後一直與家強傳不和的黃貫中（Paul）登場，全場觀眾狂叫，Paul獨唱一曲《長城》，唱罷他表示要向家駒講一聲生日快樂！接着家強出來與他擁抱，他們即場合唱Beyond自資出的第一隻碟同名歌曲《再見理想》，意義重大。
音樂會接近尾聲時Beyond三子一齊再上台，掀起全晚高潮，家強說：「好開心我哋三個人可以唱呢首歌，家駒在天之靈會好滿意，冇白費過我哋嘅心血，係咪呀？」他們合唱經典名曲《海闊天空》以完結音樂會。
Beyond三子在後台接受訪問時同聲表示很感動及開心，難得三人能夠在一起，家強說：「15年唔係一個短日子，家駒畀我哋好多考驗，好有意義，呢個係重要訊息，我哋三個可以再唱《海闊天空》。為咗個騷大家付出好大，好美滿，我對哥哥已無悔，唔係已經放棄，係會將佢嘅精神延續落去。」
重組順其自然
問到Beyond可會考慮再合作？家強說：「唔使考慮，想做咪做，唔想咪唔做，我哋三個分開咪一樣可以做音樂，有啲嘢上天有安排，家駒15年前離開，我哋經過7年掙扎，面對7年壓力，我哋點解唔唱家駒嘅歌，因為唔想俾人話借家駒嚟宣傳。」記者問他們的考驗是否包括友情？家強說：「呢啲係誤會，唔使理會，加幾分色彩冇乜所謂，我哋已經夠崎嶇。」Paul說：「有乜嘢好得過用音樂代替言語，有乜嘢好過Beyond玩一首歌，音樂可以超越言語上一切。」
採訪；駱華齡 攝影：仇志德