通脹高企，引發環球多個地方都有市民上街示威，香港嘅貨車司機都加入示威行列。財政司司長曾俊華噚日出席立法會財經事務會議，俾陳婉嫻、譚香文、湯家驊圍攻，問政府有乜新措施幫班低收入貧困人士。
講實話，正如財爺曾俊華話齋，政府今次一早已洞悉先機，預見通脹嚟臨，喺財政預算案中撥款數億元，推出二十幾項措施為低收入人士解困，曾財爺話應該可以應付目前嘅通脹形勢，如果情況變壞，會再想辦法處理。
唔少立法會議員唔理政府做得好唔好，都以窒政府為己任，難得噚日單仲偕肯出頭為政府講兩句好話，佢話政府喺利率同貨幣政策上都唔能夠控制，而且目前嘅通脹係輸入型，要政府有板斧處理高通脹問題，有一定難度，呢點佢好明白！唔通單議員玩埋呢屆立法會就唔玩，所以講嘢都中立客觀啲。