個市近日危危乎，噚日果然急挫，為防散戶恐慌性拋售，令跌勢加劇，官府隨即救市。今次政府唔係又入市打大鱷，而係總動員打救煲呔，因為噚日下晝港大民意網站公佈特首最新民望，煲呔民望急跌5.2分至60.8分，跌至近兩年低位，高官馬上出手，試圖托番起煲呔民望。
煲呔民望由去年初高位近69分，多次小漲大回，輾轉下跌至近日60分邊緣，根據圖表技術指標，其民望已形成下跌形態，兼且受制於下降軌，每次反彈至66分左右就失守掉頭回落，由於煲呔民望出現一浪低於一浪格局，恐防承受唔起進一步衝擊，後市不容樂觀，有機會繼續尋底。
除非炒陳德霖止蝕
煲呔民望大插水，短期偏軟明顯係因為入錯貨，委任咗班「聯合國式」副局長、政治助理入政府；長期負面因素，係佢自己都係小圈子選舉產物，冇真正民意支持，泡沫式民望自然難以喺高位企穩，是以輕易遭泛民衝擊，民望一戳就爆，大冧市。
入市打大鱷要銀彈，政治托市亦然，幸好庫房水頭充足大把子彈。官府入市兵分兩路，一方面由煲呔好兄弟、財爺曾俊華派糖，唔等到公佈預算案，噚日率先承諾今、明兩個年度都唔加水費，希望派糖消息可以冲喜民望；另一瓣由政務司司長唐英年統籌，噚日聲言會全力搶救大澳水災險情，必要時甚至空投食物接濟災民。
上述兩招政治托市措施成效如何，暫時係未知之數，後市觀望氣氛濃厚，因為煲呔民望欠上升動力，跌市未盡，未來一段時間相信會受制於十幾個「政治新蠢」表現，若然當中有人爆出醜聞，煲呔民望難以看升，除非煲呔炒咗陳德霖止蝕先有機會突破低迷局面，否則民望短期會低位徘徊。首個關鍵支持位睇今年7.1遊行人數，如果數字令人意外，不排除下試兩年低位59分水平。
未來兩、三個月，如果煲呔民望有機會整固，守得住60分水平，唔跌破任內低位，相信暫可一守，有可能喺10月公佈《施政報告》時反彈，事關屆時可以開倉派糖，不過完成反彈又可能再下跌，事關香港普選無期，特首民望易跌難升，北水南調入市都托唔起，長期值得睇淡，民望大熊市，冇得救。
mailto:[email protected]