今次歐國盃因由兩國合辦，單做操練同去比賽球場已經令記者們疲於奔命；而每次去一個新地點自然要查清楚地圖，搵到最快嘅交通工具，搭火車和地鐵難度不大，起碼冇去日本咁煩，但到要搭巴士就慘啦，一來巴士站位置最難搵，二來班次又唔定，有時惟有搭的士救命。
最開心係遇上有行家向你「打眼色」，大家一句hello，就咁開始溝通，之後有講唔完的話題。不過老實講，亞洲行家其實唔夠歐洲行家友善。
今次採訪遇到唔少來自中央台同廣東台嘅「自己人」幫手，而最難忘去意大利操練，喺佢哋軍營遇到意大利文好到冇得頂嘅Kathy（圖），佢唔係國家隊隨隊職員，而係負責維也納市內為贊助商設立意大利睇波中心。
意大利球員出名靚仔，Kathy喺意大利軍營就日日對住班靚仔球星，相信羨慕死唔少女球迷，而Kathy亦唔客氣搵咗意大利球員簽名留念。
意大利喺瑞士打分組賽，但訓練營設喺奧地利，據講另有原因，由於佢嗰條線嘅準決賽喺維也納踢，而意大利足總自信球隊一定入到4強，所以寧願分組賽由奧地利去瑞士，到準決賽同決賽可免卻舟車勞頓；作為意大利迷希望意軍可以如願。
nowSports主持雷民