發脹香香公主出巡冇人識
馮仁昭四圍超：梁藝齡拖好姊妹慰寂寥 - 馮仁昭

無綫前花旦梁藝齡喺近幾年都算禍不單行，05年同長毛醫生黃立榮拍拖，但戀情只維持一年多，06年尾梁藝齡去澳洲拍攝福音使團節目時發生車禍，令5條肋骨有裂痕、肝部撕裂同顎骨爆裂，雖然𠵱家仲未完全康復，但身體狀況唔錯，明顯發福成個碼，同當年喺劇集《書劍恩仇錄》中演香香公主嘅嬌俏纖麗成大對比。

牛記笠記逛街

42歲嘅梁藝齡自從同黃醫生甩拖後，感情一直未有着落，但喺剛過去嘅星期日下晝4點零鐘，梁藝齡同一名長髮女友人行尖沙嘴時竟然十指緊扣，兩人嘅手幾乎全程未分開過。當時梁藝齡着黑色鬆身衫襯牛記波鞋，打扮有些少臃腫，事實上佢都真係發脹咗唔少，成個人圓咕碌，但精神爽利，拖住女伴暢遊加拿芬道。
其間梁藝齡同女友企喺一間女裝店外裝裝吓時，有兩個小朋友突然上前捉住梁藝齡隻手傾偈，原來有兩名女士殿後，隨行嘅小朋友同梁藝齡十分熟絡，見姐姐行開即刻拉住佢，梁藝齡同小朋友傾完一輪後，就一齊行去周星馳喺加連威道開設嘅gi商場shopping。

試鞋齋睇唔買

現場見梁藝齡嘅同行女伴走入其中一間鞋店試凉鞋，但結果冇買到，繼而又去隔籬間舖頭睇袋，都係齋睇冇買，之後佢哋又拖手一齊離開。雖然梁藝齡做過花旦，但唔知係咪身形有大變化，全程都冇途人認得出佢。