摩根士丹利嘅港股策略員夏朗（RobHart）上個月底內部調職去咗做Buyside，即係基金經理，佢之前睇開嘅長實（001）同港鐵（066）兩家公司即刻冇人理。大摩最近出咗通知，話暫時唔會cover𠵱兩間公司，估計120日內先再睇番咁話。以噚日收市價計，長實同港鐵市值分別達2803億同1493億銀，堂堂大行因為分析員調職，居然搵唔到第二個跟千億市值嘅藍籌股分析員，似乎有點講唔通。
華華有位以前做股票分析員嘅朋友曾經打趣話，分析員嘅工作有啲似資料搜集員，幫吓基金經理搵資料，分析吓股票咁，如果大摩嘅基金經理話，由於冇咗分析員睇住長實同港鐵，所以暫時唔投資𠵱兩隻股票，咁噚日長實、港鐵分別跌近4%同3%，話唔定可以幫個客避過一劫。
唔做分析員做芬佬
華華心諗，就算一間「奀雞」公司主管有事，都會有替工頂上，何況係一間咁出名嘅大行，更應該做到任總所講嘅「鐵嘅衙門，流水嘅官」。你知家吓個市正係「今日唔知聽日事」，如果有乜風吹草動，個客問起點睇長實同港鐵，你估大摩會點答呢？唔通答：「Sorry，新請嗰個分析員未返工，遲啲先覆你！」
講開又講，大摩地產分析員由sellside轉做buyside都唔係頭一次，好似之前卓百德同謝昭平，家陣都轉咗做芬佬，係傳統抑或有咁啱得咁蹺呢呵！
電郵：mailto:[email protected]
