本月30日是Beyond主音黃家駒逝世15周年，昨日是他的生忌，其胞弟黃家強特地於昨晚在灣仔會展為家駒舉行紀念音樂會，本地band壇好友紛紛現身悼念故友，更聚首一堂獻唱Beyond歌曲，令一眾Beyond歌迷齊聲叫好！
為紀念黃家駒而舉行的「別了家駒十五載…海闊天空音樂會」昨晚舉行，除了Beyond三子黃家強、黃貫中（Paul）和葉世榮外，圈中好友和band友包括林一峰、at17、太極、周國賢和黃耀明等，皆上台獻唱Beyond歌曲，其中黃家強、周國賢和Kolor合唱《我是憤怒》為音樂會揭開序幕。
音樂會在8點30分開始，現場播出阿Paul、世榮、黃耀明等講及家駒往事的片段，他們還向家駒說生日快樂。其中阿Paul在片段中說：「家駒份人好長氣，成日話男人唔可以只得一個女人，要有好多女人，我哋成日同佢拗，但次次都拗佢唔贏，因為唔夠佢長氣。我好努力練結他，冇放棄，相信有一日我會彈得好過你，你喺上面都要努力。」
歌迷湧到台前
林珊珊在片段中說：「我諗起你似笑非笑嘅笑容，好溫柔，好豪爽嘅笑聲，彈結他強而有力嘅手。」接着家強、周國賢及Kolor合唱《我是憤怒》，大部份觀眾都湧到台前，後排觀眾則企起身高舉和平手勢，觀眾情緒相當高漲。之後周國賢獨唱《午夜迷牆》及Kolor唱《永遠等待》。
演唱會中播出家駒的聲音說：「你哋今日嚟演唱會要有秩序唔好咁瘋狂，有秩序用手同身體去感受，唔好衝出嚟！」另外，又播出一些家駒過往最喜歡講的金句的字幕如：「香港只有娛樂圈冇樂壇。」家強台上感觸地說出家駒曾對他說過：「生命不在乎有冇啲乜嘢，而係在乎做過啲乜嘢!」他覺得哥哥以前做過很多事，例如帶他們去過非洲，令他們感受到第三世界小朋友的無助。
粗口片剪唔晒
其實家強近日為製作家駒音樂會及紀念展覽忙個不停，令他勾起不少回憶，日前家強接受本報專訪時說：「我呢排剪咗好多生活片段放喺展覽上畀大家睇，一路睇一路覺得大家都好抵死，幾個都鍾意整蠱人，搞搞震，又粗口滿天飛，所以剪片剪到我死，句句都有，嘟到七彩，都唔知點剪。」家強表示亡兄有兩個遺願，其一是推出純音樂唱片，其次是家駒當年希望在白石難民營開騷，家強說：「𠵱家都冇難民營，不過我會延續佢嘅精神，用音樂去慰藉人心。」
採訪：駱華齡 攝影：仇志德
全家睇騷念至親
昨晚在會展舉行的家駒紀念音樂會，除了忠心fans捧場外，家駒的父母和胞姊等也有前往睇騷，一起懷念家駒生前往事。
張繼聰忠實fans
家駒的姊姊小瓊也預先錄了片段在台上播出，她在片段中說：「家駒走咗咁耐，但喺我心目中佢係一直都喺度，完全冇離開過。」相信這番話也說出不少fans的心聲。
本身是Beyond歌迷的張繼聰也有捧場，他興奮地說：「我哋呢代人冇人唔鍾意Beyond，我今日專登喺屋企煲吓Beyond啲碟先出嚟，家駒就好似我哋嘅大哥哥咁，今日嚟就好似同佢賀壽。」
對於家強和阿Paul「破冰」演出，張繼聰坦言這是所有Beyond歌迷的願望，他說：「之前喺其他演出地方都見過家強同阿Paul，自己都好似fans咁，戰戰兢兢。」
街訪：Fans喜三子重聚
昨晚在會展舉行的「別了家駒十五載…海闊天空音樂會」，吸引無數跟隨Beyond多年的忠實fans捧場，一起懷念和重溫家駒的歌曲和往事：
內地歌迷劉先生：我哋喺東莞嚟，專程睇呢個音樂會，睇完就立即走。我哋身上着住印有Beyond字樣嘅T恤，價值60蚊，我哋鍾意咗Beyond十幾年，覺得今晚音樂會好有意思。對於Beyond三子可以再度同台，我哋好開心，真係好難得，所以我哋一定支持佢。
陳小姐：我鍾意咗Beyond十幾年，中學時代開始，見到佢哋三子重聚真係好開心。我一直都掛住家駒，不斷諗住佢啲嘢，咁啱我有親人同家駒同一個庵堂，我拜親人時會拜埋家駒。
