雪廠街都爹利街之西洋會（ClubLusitano）會所大廈幾年前改建落成，適逢租務市場開始自谷底反彈，相信近一兩年收租收到笑。西洋會乃葡萄牙人會所，以前未改建之時，西洋Ｂ曾請左丁山上去會所幾次吃午飯，點知新廈落成之後，西洋Ｂ反而冇請過左丁山一次。香港之西洋人聽講數目漸少，西洋會會員數目縮減，但會內元老仍然認為唔需要招收新會員。無他者，有幢大廈在中環核心區收租，財力不同凡響，使乜收咁多會員會費吖。
上星期五中午，香港大學嘅香港經濟研究中心與獅子山學會聯合舉辦午餐會，搵三位專家講「競爭法」，加埋主持人在內，一共四位西人講者，其中三位反對，一位律師贊成，律師名叫NickTaylor，來自澳洲律師行Gilbert+Tobin，而呢間律師行就係夥拍夏（佳理）方吳律師事務所贏得政府合約，作為特區政府嘅「競爭法顧問」，據聞收費高達一千六百萬港元。
三位專家圍攻Taylor，照計好難招架。但呢位律師走慣碼頭，轉移概念，將「競爭法是否需要」嘅議題轉為「競爭法可為香港帶來增值（value-added）」，又話香港係小型開放社會，競爭性甚強，引入競爭法，冇傷害現有體系啫，如果大家都唔犯規嘅話，怕乜嘢競爭法啫？呢番辯詞，令人諗起○三年之廿三條立法大爭論，當時咪有人講到：如果你係良好公民，怕乜嘢呀！
一位來自美國嘅商人發言，指美國反托辣斯法案多年來製造不少法律訴訟，益晒啲律師與所謂獨立專家，近年好多案件打到上最高法院，被法院推翻，判被告無罪，但被告公司已經大大勞民傷財，所以佢唔明香港點解好學唔學，要學美國啲劣貨！散會後，香港電台西人記者想訪問律師Taylor，點知律師拒絕，話唔想畀記者錄音喎！洋記者話，我哋係RTHK噃，梗係要錄音啦，講咗一輪，不得要領，洋記者唯有激氣而去。