我求大俠都係一個愛書之人，N年前就睇過幾米《向左走‧向右走》嘅繪本。書入面男、女主角一個習慣向左行、一個就向右，令到佢哋始終唔可以相遇。《向左走‧向右走》入面男女主角見唔到面係冇緣，但係法國前鋒安歷卡同隊友毫無交流，就一定係自己攞嚟衰！
話說法國喺第1場比賽同羅馬尼亞踢成0:0，法國可以話攞嚟衰嘅，我求大俠見到佢哋出安歷卡打正選箭頭，經已非常唔開胃。安歷卡呢條友仔出名獨食，啲波一到佢腳下一定冇回頭，真係就嚟連美國太空總署都要探索下呢個「黑洞」。
寧窄位勁射都唔交波
喺比賽過程中，安歷卡同另一名前鋒賓施馬可以話完全冇交流，一個左邊一個右邊好似當大家係「路人甲」咁，記得仲有一球賓施馬空晒，安歷卡寧願整球窄角度射波都唔交，連個旁述都忍唔住串佢：「你想學尹巴士頓射金球都唔係咁搞！」之後賓施馬都俾佢搞到好冇癮，自己射鬼咗啲波就算！
其實安歷卡「犯眾憎」都唔係冇前科，歐聯決賽射失12碼又賴格蘭俾佢上陣時間唔夠，搞到佢未熱夠身就射，而家又唔肯同賓施馬合作，睇嚟問題出喺佢身上多啲喎！
今場法國先失兩分，如果再喺死亡之組咁打落去，你都咪話唔頭痕。希望「星座小王子」快啲醒醒，等亨利出返嚟之後唔好再用安歷卡啦！
我求大俠又再次諗起買阿歷山大費爾神射手嗰位名家，佢賽前拍晒心口話法國應該掂，唔知嗰位本報名家見到安歷卡咁嘅表現之後，有冇對住部電視爆粗？