克羅地亞周日1:0險勝東道主奧地利，我求大俠成晚都吼實克軍教練比歷，佢一舉手一投足，似足美國搖滾樂隊主音JonBonJovi，嗰種星味真係搶晒場上球員嘅風頭！
克軍3分鐘就博得12碼，可惜莫廸歷射入歐國盃史上最快12碼後，球隊就做咗縮頭烏龜，搞到完場後班球員扒晒落地，似輸波多過贏波。教練比歷亦話球員賽後番到更衣室變晒死狗，搞到佢要播搖滾歌，要球員一路跟住唱，實行搖散頹氣、滾走衰氣咁話。
呢個比歷認真多才多藝，組咗隊叫Rawbau嘅Band，自己做埋主音兼結他手；今次為鼓勵球隊出戰08歐國盃，仲特登錄製首隊歌叫《FieryMadness（火一般的瘋狂）》，聽過嘅人都評價：好快上口、好易入耳。
話說回來，克羅地亞後備席除比歷外，仲有普辛尼基、阿辛奴域兩大名宿，論魅力、星味，在場40幾位球員加埋都仲差好遠！即使來季加盟熱刺、身價達1,650萬鎊（約2.55億港元）嘅克軍新星莫廸歷，比起前輩亦至少差一皮。希望好似比歷所講，「失勢係入波太早所致」，希望今次係留力，唔畀德國佬知道虛實！
莫廸歷似名大於實
不過，我求大俠初步睇過莫廸歷打波後，覺得就算熱刺今次冇入錯貨，都肯定係畀多咗好多錢！呢位球員冇身形都算，速度、爆炸力都麻麻，最慘係唔受得撞，唔好話同美斯冇得比，就連熱刺新隊友杜斯山度士都不如，而呢位墨西哥國腳身價最多都係唔過200萬鎊啫！