人總是活在矛盾中，Beyond是港人的集體回憶，也是葉世榮的情意結。奈何人大了，展翅高飛是必然，歌迷喜歡Beyond，但三個人的Beyond又何價？正如世榮說：「一張枱四隻腳，斷咗一隻，點載啲重嘢？我明白歌迷覺得Beyond可以代表香港某啲嘢，但單飛喺我人生中好重要，仲係三個就好難成長，我仲想學嘢，想有更多發展。
「老實講，我哋三個才華加埋都唔夠家駒咁好。當家駒離開時，Beyond已經失去重心同靈魂人物，咁個意義有幾大呢？我哋只係精神學到家駒，但能力係做唔到家駒咁樣，與其係咁，不如豐富自己。」
「大家要放得低」
世榮是第一代Beyond成員，和家駒於83年組隊，經歷過多次成員變動，黃家強和黃貫中已是後期入伍，所以世榮才是真正的唯一元老，他與家駒的深厚情誼更是不可分割，但春去秋來，故友走了15年，篤信佛學的世榮從昔日哀傷到今日的平靜，過程中學會了不執着、莫強求，他說：「凡間嘅所有朋友都唔好令家駒留戀呢個世界啦，佢應該有個更好嘅地方要去，明明阿彌陀佛，我哋猛話家駒好掛住你，佢會唔捨得走，佢𠵱家要做嘅一係輪迴，續佢嘅緣，一係去西方極樂，唔好再畀咁多壓力佢，都十幾年啦，大家要放得低，唔好執着。」
想當年的故事，世榮覺得最好玩的時候就是最難捱的時候，做窮鬼最無憂，他笑說：「初生之犢不畏虎吖嘛，心口寫個勇字，細個有band玩就開心，生活上嘅壓力唔理。家駒仲好笑呀，佢有句格言：『我哋瞓晏啲可以食少餐，慳番啲錢。』但夜晚食消夜喎，吹脹！」
暱稱黃伯或油條
組隊初期，家駒和世榮玩地下樂隊，白天上班，晚上夾band。當時世榮從事保險業，主力sell商保，是他介紹家駒入行。家駒自言做sales成績慘淡，世榮則笑咪咪說：「佢成績一般啦，都聰明勤力嘅。嗰時我主要call飛髮舖，家駒爸爸係做工業嘅，可能知佢阿爸會介紹啲客畀佢，都係主攻佢爹哋嘅行家，工廠、貨倉、皮革廠嗰類。佢鍾意呢份工夠自由，做一、兩張單可能成個月唔返工，可以練結他又有底薪。」
世榮說家駒見解獨特，有智慧，但老積，大家若非稱呼他做黃伯，就是叫他油條，世榮說：「佢早出嚟做嘢，見世面多，但佢係個智者，影響好多樂隊、樂手，貢獻好偉大。家駒嘅嘢歷久常新，跨越時空，係永恒㗎，我喺佢身上學到音樂上嘅嘢之外，亦學到好多做人道理。」